Pagtugot pagtukod og sanitary landfill sa Binaliw gipaabot
CEBU, Philippines — Naa na sa Konseho sa siyudad sa Sugbo kon tugotan ang gipangayong special permit sa ARN Builders Inc. ang developer sa 1.7 ka ektarya nga tukoran sa central material facility ug sanitary landfill sa Barangay Binaliw.
Ang City Zoning Board miingon nga natuman sa developer ang mga gikinahanglang mga permits subay sa City Ordinance 1656 o Zoning Ordinance.
Kini mao ang barangay endorsement, public hearing, ug konsultasyon sa barangay nga imbitado ang mga nagpuyo duol sa dapit.
Ang zoning board nihatag og sertipikasyon nga nakapahigayon gyud sila og public hearing ug apil sa nitambong si Binaliw barangay kapitan Wilson Bacor kansang yuta naa sa duol sa lugar diin tukoron ang MRF niadtong Disyembre 7, 2017.
Niadtong Marso 7 sa miaging tuig usa ka barangay resolution ang naaprubahan nga nagpadayag nga wala sila’y pagsupak sa katukuran sa maong pasilidad sa kondisyon nga motuman ang developer sa tanang mga rekisitos ingon man Environmental Impact Statement(EIS) ug Environmental Compliance Certificate(ECC).
Niadtong Marso 6, 2018 si Konsehal Alvin Arcilla, representante ni Mayor Tomas Osmeña sa zoning board mi-sponsor og resolusyon nga nangayo og approval sa special permit sa developer. Nobiyembre sa miaging tuig ang ARN Builders mi-apply og special use permit sa agricultural land nga tukoran sa maong pasilidad.
Nagkanayon ang OIC sa City Planning and Development Officer Jose Guisadio nga base sa ordinansa kinahanglan ang konseho ang moaprubar sa aplikasyon.
Si Konsehal Jose Daluz III nangutana kang Guisadio kon aduna bay tamdanan nga sundon sa Konseho pag-aprubar sa aplikasyon. Ang project director sa ARN Builders ug consultant Sherwin Santos miingon nga ang pasilidad moproseso sa basura. (BANAT NEWS)
- Latest
