Columbian Dyip gilihian og daog

CEBU, Philippines — Sa ilang pag-ilis og team name, ang Columbian Dyip (kanhi Kia Picanto) mihimo og nindot nga sugud sa PBA Commissioner's Cup human sila mirehistro og dominanteng kadaugan batok Blackwater Elite, 126-98, kagabii didto sa Smart Araneta Coliseum.

Ang Columbian laraw nga mamawi human sa ngil-ad nilang gipakita sa All-Filipino Cup diin nangiwit sila sa standing.

Ang Columbian nakakita karon og sinaligan sa scoring human mipakita sa iyang ka maayong laki ang Fil-American nga si Jerramy King kinsa mirehistro og career-high 30 points. Ang import nga si CJ Aiken igo ra mihimo og nuybe puntos apan milangkat kini og 22 ka rebounds uban ang duha ka blocks.

"In terms of his role for us, his inside presence and his rebounding, CJ was okay," matud pa ni Columbian coach Ricky Dandan. "But we need him to be more aggressive, especially when he goes up against bigger imports."

Laing Fil-Am nga si Rashawn McCarthy ang mitampo usab og 21 puntos alang sa Dyip.

Ang import sa Blackwater nga si Jarrid Famous mirehistro og double-double nga 35 puntos ug 22 ka rebounds apan nakawang iyang paningkamot tungod usab kay giuwan og turnovers ang iyang koponan rasun sa dakung biya batok sa Columbian.

Ang Gilas Pilipinas cager nga si Allein Maliksi nakahimo og 22 puntos, samtang si Mac Belo midugang og 11. (FREEMAN)