Duha ka fratman gipamusil
![Duha ka fratman gipamusil](https://media.philstar.com/images/articles/baril_2018-04-21_22-29-43.jpg)
CEBU, Philippines – Duha ka mga batan-on diin usa niini menor de edad nga sakop sa Tau Gamma Phi ang nalandig sa tambalanan human sila gipamusil samtang nag-estambay sa may Camella Homes, Lawaan, Dakbayan sa Talisay kagahapon sa sayo sa kaadlawon.
Ang nalandig sa tambalanan mao sila si Mark Barleso, 18 anyos, taga Lawaan 3 ug ang kauban niining 17-anyos nga taga Lower Maghaway.
Matud pa ni Senior Police Officer 1 Darwin Gonzales, Desk Officer, sa Talisay City Police Station nakadawat sila og tawag gikan sa Talisay District Hospital nga adunay mga batan-on nga nalandig sa tambalanan nga biktima sa pagpamusil.
Base sa inisyal nga imbestigasyon adunay lalaki nga naabot sa maong lugar ug nisangpit pa kini sa mga biktima ug giingong nakiglamano apan nabantayan sa mga biktima nga dili mao ang paagi niini sa paglamano subay sa ilang fraternity.
Dihadiha gikatahong gipaulanan sila og bala sa maong lalaki ug pagkahuman daling misibat. Gitug-an ni Gonzales si Barleso nakaangkon og samad sa iyang kiting samtang naigo usab ang 17 anyos diha sa kilid ug parehong gidala sa tambalanan.
Blangko pa ang kapulisan sa suspetsado apan wala nila gisalikway ang posibilidad nga paregla lang sa mga batan-on ang maong hitabo.
Siyam ka mga basiyo sa bala sa .9mm nga armas ang nakuha diha sa nahitaboan.
Sa pikas bahin, mipahimangno sa publiko si Cebu Provincial Police Office director Senior Supt. Edgar Alan Okubo ilabi ngadto sa mga ginikanan sa kabataan nga ilikay sa pagpaapil og mga fraternities nga dili diay lehitimo.
Gihimong sanglitanan ni Okubo ang nahitabo sa duha ka menor de edad nga gi-recruit sa nagpatuong lehitimong miyembro og fraternity apan diay to gigamit lang sa mga suspek ang pangalan sa grupo aron paghimo og kaugalingon nilang mga sakop.
Nahitabo kini niadtong Abril 4 sa dihang nangreklamo ang usa ka 11 anyos ug 12 anyos nga giingong mga miyembro sa maong fraternity kay gipugos sila pagpasuyop og shabu sa ilang mga kaubang hamtong didto sa Sitio Ilihan, Barangay Simala. Nadakpan sa mga polis ang maong mga kauban sa mga biktima nga gipang-ila nga silang Michael Olanda, 20, Armel Cuizon, 22, ug si Marvin Aliponga, 19.
Apan giingong dugay nang mitiwalag sa ilang fraternity ang mga suspek ug naghimo og bag-o.
“Nag-form siya ngayon ng fraternity niya recruiting minors. Ang masama pa duon, he continuously carry the name of Akrho. Labag daw sa by laws ng Akrho na mag-recruit ng minors,” si Okubo miingon.
Si Okubo miklaro nga walay dautan kon moapil og mga fraternity kon maayo ang tumong sa grupo ug makapalambo sa pagkatawo sa miyembro ug ingon man sa katilingban.
“They should be told of the laws ng fraternity na pinapasukan nila. Dahil baka niloloko din sila and as minors, they should understand na bawal silang ma-recruit kung minors,” si Okubo miingon. (Camille Pateres/IBM)(BANAT NEWS)
- Latest