Konsumo sa Toledo hospital gikawat
CEBU, Philippines – Gibalhug sa prisohan ang duha sa upat ka nanglungkab sa Toledo City Hospital ug gidala ang pangkonsumo niini niadtong Miyerkules sa kaadlawon.
Giila sa Toledo City Police ang mga nadakpan nga sila si Donald Sabroso, 19, ug Lynjon Salazar, 21-anyos.
Samtang ang nakaikyas mao sila si Christian Emer John Canillo alyas Yanyan ug ang igsuon niini nga si Elvin Canillo. Sigun pa ni SPO1 Roxam Enerio nga niadtong Miyerkules sa kaadlawon giguba ang sliding window sa likod sa hospital aron makasulod ang mga suspek.
Nasakpan kini sa guwardiya sa tambalanan ug gigukod apan wala naapsi ang mga suspek.
Gikawat niini ang usa ka sakong bugas nga kantidad og P2,800, lima ka kilong isda balor og P750, usa ka kaldero nga tag P500 ug ang usa ka radyo niini nga mokantidad og P500.
Atol sa hot pursuit operation, nadakpan silang Sabroso ug Salazar.
“Nakapangawat na gyud na sa una si Yanyan pero di lagi mopadayon og pasaka og kaso ang reklamante. Igo ra pa blotter,” matud ni Enerio.
Matud pa sa maong polis nga gipasakaan na og kasong pagpangawat ang maong grupo lakip na ang duha nga wala madakpi. (/GMR)(BANAT NEWS)
- Latest
