Cavs, Jazz nakatabla

CEBU, Philippines – Nakabangon ang Cleveland Cavaliers ug ang Utah Jazz human mahagba sa miagi  nilang duwa aron pagtabla sa serye batok sa tagsa-tagsa nila ka mga karibal  sa first round playoffs sa National Basketball Association (NBA) kagahapon sa managlahing binyu.

Si LeBron James mipabuhagay og 46 puntos ug 12 ka rebounds sa Cavaliers nga nakabawos sa Indiana Pacers, 100-97  didto sa Quicken Loans Arena sa Cleveland, Ohio.

Literal nga nagkayo ang opensa ni James gumikan kay siya maoy mikadlit sa unang 16 puntos sa duwa dayon na ngadto sa pagkolekta og 29 puntos sa halftime.

Nabuligan hinuon ang Cavs og maayong palad sa maong kadaogan gumikan kay si Victor Oladipo sa Pacers nasipyat sa iyang tres nga makatabla unta sa iskor sa nabiling 27 segundos sa duwa.

Bisan og daog, dili hinuon angay nga magmaya ang Cavs gumikan kay na-injured na sab ang ilang star forward nga si Kevin Love. Nayayay ang kumagko ni Love sa katapusang 3:43 sa duwa ug unsa man gani ang iyang estado seguradong makaapekto sa Cavs sa nahibiling bahin sa serye.

Sama sa Cavs, ang Jazz nakabawos sab batok sa Oklahoma City Thunder.

Ang rookie nga si Donovan Mitchell maoy bida human kini mitali og 13 sa iyang 28 puntos sa katapusang kuwarter aron pagtuboy sa Jazz ngadto sa 102-95 nga pagpaluhod sa inilog nga Thunder.

Dako sab og natampo si Derrick Favors nga mipupo og 20 puntos ug 16 ka rebounds alang sa Jazz, ingon man si Ricky Rubio nga mibahog og 22 puntos sa labing una niyang daog sa playoffs sa iyang karera.

Apan lahi ang nahitabo didto sa Houston gumikan kay ang Rockets misutoy ngadto sa 2-0  nga  bentaha batok sa Minnesota Timberwolves.

Si Chris Paul miiskor og 27 ug si Gerald Green miduslit og 21 puntos alang sa Rockets nga milusad og mainit nga ataki sa ikaduhang kuwarter aron paglubong sa Timberwolves, 102-82.

Ang makapakurat kay gilampaso sa Rockets ang Wolves bisan ang ilang alas nga si James Harden igo lang miiskor  og 12 puntos.

Ang Rockets naglabaw og 15 puntos sa halftime, nga ila pang gipaburot ngadto sa 26 puntos, 91-65 nga maoy nakapasukarap sa Wolves sa nahibiling nuybe minutos sa duwa.