Abogada gipangita og pipila ka oras

CEBU, Philippines – Nilanat og pipila ka oras ang pagpangita ni Atty. Jamaal James Calipayan, chief of staff ni Kongresista Jonas Cortes, human wala nauli ang asawa niini nga si Atty. Sarah Calipayan.

Alas 6 sa buntag kagahapon nitaho sa Fuente Police Station si Jamaal human wala mouli ang asawa sukad ala 1:30 sa kadlawon.

Si Jamaal nakadawat og text message sa iyang asawa alas 11 sa gabii nga padulong na kining mouli apan niabot ang pipila ka oras wala pa kini niabot ug dili na usab makontak ang cellphone niini.

Tungod sa maong hitabo nag-post sa social media si Jamaal nga nangayo og tabang kung kinsa ang nakakita sa iyang asawa ug niabot gyud og pipila ka libo ka shares ang maong post.

Ang sakyanan sa asawa nakit-an sa parking area sa Banilad Town Center apan walay      tawo.

Nag-abot ra usab sila sa maong parking area diin   nasayran sa bana nga sa hotel nakatulog ang iyang asawa tungod kay nakainom.

Si Jamaal nagpasalamat sa tanang nitabang diin iyang gitug-an nga bisan kinsa nga bana o asawa nga mawala ila gyud buhaton ang susama sa iyang gibuhat nga mangita gyud.

Nanawagan si Jamaal nga dili lang husgahan ang iyang asawa sa nahimong kahasol ilabi na nga napublikar ang pagpangita niini.

Mapasalamaton si Jamaal sa kapolisan sa ilang pamilya ug sa mga tawong nitabang kaniya. (/GMR)(BANAT NEWS)