40 ka balay naugdaw sa Talisay ug Barangay Labangon

CEBU, Philippines – Gibanabana nga moabot og 40 ka balay ang naugdaw sa duha ka sunog nga miulbo sa Barangay Labangon, dakbayan sa Sugbo ug sa Lawaan 1, dakbayan sa Talisay kagahapon sa buntag.

Ang unang sunog miulbo sa Barangay Labangon nga nagsugod sa panimalay ni Pilar Utrera mga alas 9:42 ug nakontrolar sa kabomberohan sa paglabay sa mga tunga sa oras.

Matud ni City Fire Marshall Noel Nelson Ababon nga gibanabanang P300 mil ang danyos sa maong sunog. Wala’y naangol ug lunlon kabtangan ra ang naangin sa sunog.

Ang kagamhanan sa dakbayan sa Sugbo mihatag dayon og tabang sa mga nasunogan, sama sa pagkaon, ug giandaman na og tag P20 mil nga hinabang salapi, ug mga construction materials.

Naandan na nga ang siyudad mohatag og tag 10 ka pligo nga sin ug plywood sa mga masunogan aron makatabang kanila pagpatukod og panimalay.

Matud ni Genevieve Alcoseba, chief operations sa Division for Welfare of the Urban Poor (DWUP), nga hangyuon nila ang tag-iya sa maong pribado nga yuta nga gipuy-an sa mga nasunogan nga i-reblock unta ang maong dapit sa dili pa tukoran pagbalik og panimalay.

Sa Talisay, naugdaw usab ang gibanabana nga 20 ka kabalayan didto sa Sitio Mananga 1, Barangay Tabunok.

Si Fire Senior Inspector Arra Alpajaro nibutyag nga nadawat nila ang alarma mga alas 10 sa buntag, ug dali ra kaayong nakakatap ang kayo sa kabalayan ilawom sa taytayan.

Ang pag-charge sa cellphone maoy gitan-aw nila nga hinungdan sa sunog. Wala hinoo’y naangol sa maong sunog, gawas sa usa ka traysikol nga naapil sa pagkasunog. (CNU Intern, Rowena D. Capistrano ug Gabriel C. Bonjoc/RUB (BANAT NEWS)