Narco-politicians nilansar

CEBU, Philippines — Gibutyag ni Cebu Provincial Police Office Director Senior Supt. Edgar Alan Okubo nga adunay dili momenus 20 ka mga kandidato sa barangay nga niduso og certificate of candidacies ang naapil sa ilang listahan sa mga narco-politicians.

Si Okubo nagdumili pagbutyag kon si kinsa sila, kon taga asa sila nga barangay ug kon drug user o drug protectors ba sila.

Matud niya wala sila sa posisyon aron pugngan sila nga molansar karong eleksyon.

“Wala pang directive. It may or may not be released (narco-politician list) but we just have the references in case the higher headquarters try to request the list, we will be ready,” matud pa sa maong direktor. Pipila ka sector ang mihagit sa gobiyerno nga ipublikar ang mga pangalan sa mga suspetsadong mga narco-politicians aron pagpahibalo sa mga botante kon kinsay angay botaran.  Hinuon gisalig na lang sa mga otoridad ngadto sa mga botante ang pagpili kay sila mismo nakaila kon kinsa kining mga nalambigit sa drugas nga mga kandidato.

Sa pikas bahin, duha ka mga barangay sa lungsod sa Tuburan ang i-rekomendar sa Cebu Provincial Police Office nga iapil sa EWAS (Election Watchlist Areas) tungod kay adunay election related violence sa maong mga lugar niadtong mga nakalabay nga eleksyon.

Dili pa ikabutyag sa CPPO kining mga barangay kay ang Police Regional Office-7 maoy motimbang-timbang niini kay kon mapaubos sa EWAS tutokan kini sa kapolisan.

Sa padayong filing sa Certificate of Candidacy (COC), giingong hayan mapun-an pa ang maong EWAS ini’g abot na sa mismong adlaw sa piniliay. (BANAT NEWS)