Pacquiao wala pa’y final decision kabahin ni Roach
CEBU, Philippines — Mitingog na si Manny Pacquiao human sa iyang pagpakahilom kabahin sa estado sa iyang relasyon uban sa trainer niyang si Freddie Roach.
Sa miaging semana, nagpusotpusot ang mga taho nga gitaktak na ni Pacquiao si Roach isip iyang head trainer sa umaabot niyang away batok ni WBA welterweight champion Lucas Matthysse karong Hulyo 15 didto sa Kuala Lumpur, Malaysia.
Gani ang Canadian adviser ni Pacquiao nga si Michael Koncz mianunsiyo nga si Buboy Fernandez, ang sumpay sa pusod nga higala ug dugay nang assistant trainer ni Pacman mao na’y mihulip ni Roach.
Sa iyang bahin, si Roach mipagawas og opisyal nga pamahayag diin iyang giangkon nga nasakitan siya sa gibuhat sa paborito niyang boksingero nga iyang gikauban sa milabay’ng 15 ka tuig.
Apan, kagahapon sa buntag, ang Pinoy’ng kampiyon mihatag og katin-awan ning gikagubtan nga isyu.
Matud ni Pacquiao nga wala pa siya’y final decision kalabot ni Roach. Kun ugaling makadesisyon na siya sud ning semanaha, si Roach mao ang labing unang mahibaw niini.
Ang 39-anyos nga senador gikatakda nga molupad sa Kuala Lumpur karong Huwebes aron ipahibalo ang bugno nilang Matthysse.
Duna hinuo’y pormal nga press conference aron ianunsiyo ang maong away karong Miyerkules didto sa City of Dreams sa kaulohan.
Pagatambongan kini nilang Pacquiao, Matthysse ug Oscar Dela Hoya ug Eric Gomez sa Golden Boy Promotions. (BANAT NEWS)
- Latest
