Cavs naunhan sa Pacers
CEBU, Philippines — Mipabuhagay og 32 puntos si Victor Oladipo alang sa Indiana Pacers nga milubong sa Cleveland Cavaliers, 98-80 sa Game 1 sa unang hugna sa best-of-seven NBA playoffs kagahapon didto sa Quicken Loans Arena sa Cleveland, Ohio.
Gawas nga ngitngit ang kampanya sa Cavs nga makataak sa finals sa ikaupat nga sunod-sunod nga higayon, nabugto sab ang 21 ka sagunson nga daog ni LeBron James sa unang hugna sa playoffs. Sukad masukad, si James wala pa makasinati sa maong matang sa kaparotan hangtod nga sila gipayaka sa Pacers.
Mangtas kaayo ang Pacers pagsugod pa lang sa duwa hinungdan nga milabaw dayon sila og 19 puntos sa unang kuwarter, 33-14 nga ila pang gipaburot ngadto na sa 23 puntos. Igo lamang nakasikit ang Cavs ngadto sa siyete puntos.
Gibohan ang Cavs sa ilang fans nga nalubong og 21 puntos atol sa halftime, 59-38.
Si James mirehistro og ‘triple double’ sa iyang 24 puntos, 10 ka rebounds ug 12 ka assists, apan ang nahibiling starters sa Cavs nagkumboya lamang og 25 puntos.
Si Kevin Love dunay 17 ka rebounds, apan naangklahan ngadto lamang sa nuybe puntos.
Ang Cleveland mipaduol ngadto sa 73-65 pagsugod sa katapusang kuwarter, apan mao na kadto ang katapusan nilang utong gumikan kay gipabuthan sab dayon sila og 12-2 run sa Pacers.
Didto sa Houston, si James Harden miburak og 44 puntos aron giyahan ang Houston Rockets nga makaipsot sa Minnesota Timberwolves, 104-101 sa Game-1 sa ilang Western Conference first-round playoff series.
Nakabuena mano sab og daog ang Boston Celtics ug Oklahoma City Thunder sa tagsa-tagsa nila ka serye.
Sila si Al Horford, Terry Rozier ug Marcus Morris nagkumboya’g 68 puntos sa dihang ang Celtics midaog sa Milwaukee Bucks sud sa overtime sa iskor nga 113-107, samtang si Paul George miayag og 36 puntos aron pangulohan ang Thunder batok sa Utah Jazz sa iskor nga116-108. (BANAT NEWS)
- Latest
