Politika sa barangay

Nagsugod na gayud ang pag-arangkada sa eleksiyon sa barangay ug Sangguniang Kabataan. Wala na gayud kini kapugngi bisan pa man sa paningkamot ni Presidente Rodrigo Duterte pag-uktaba niini kay nahadlok siya nga gamiton kini niadtong mga nalambigit sa negosyo sa gidili nga druga.

Gani, liboan na sa tibuok nasud ang nagpanon ngadto sa mga buhatan sa Commission on Elections aron pag-file sa ilang kandidatura, ug karong pipila ka adlaw, magsugod na usab ang kampanya sa mga kandidato pagka-kapitan ug konsehal alang sa piniliay sa Mayo 14.

Taliwala niini, magsugod na usab ang kinamangay sa mga lokal nga opisyal sa lungsod man, o sa siyudad. Dili ikalimod nga kon usa ka gani ka mayor o bise mayor, kinahanglan nga ang imo nga pundasyon lawom gayud nga pagkatusok sa mga barangay.

Buot nako ipasabot nga isip usa ka opisyal sa lungsod, o dakbayan, kinahanglan nga aduna kay daghang suporter sa kabarangayan. Importante kaayo kini gumikan kay dako ang papel nga gihuptan sa mga opisyal sa barangay sa eleksiyon usab sa lungsod, o siyudad.

Mao na nga dili na nato ikatingala pa kon daghan sa mga kandidato sa barangay ang tulin nga mopailalum gayud sa mga lokal nga partido. Kini bisan pa man sa probisyon sa balaod nga kinahanglan non-partisan ang kalihokan sa polítika sa barangay.

Dinhi lang sa dakbayan sa Sugbo, kugi na karon ang Bando Osmeña Pundok Kauswagan ug ang oposisyon nga Barug PDP-Laban pagbubo og tabang ngadto sa ilang mga kandidato sa barangay. Pangandam usab kini nila sa dako unya nga bugno’ng lugaynon sa sunod tuig.

Hagbay ra nga nanganti si Mayor Tomas Osmeña nga ila nga paninguhaon sa BOPK nga maangkon ang kadaghanan sa mga bag-ong opisyal sa kabarangayan. Sa pagkakaron, 65 sa 80 ka barangay sa siyudad kaalyado man sa Barug PDP-Laban.

Sukad pa man sa una, suportado na sa mga politikal nga partido ang eleksiyon sa kabarangayan. Kini bisan pa man sa balaod nga nagdili sa partisan politics sa barangay. Hinuon wala’y bili ang mao nga balaod gumikan kay wala kini ngipon nga mopaak niadtong makalapas.