Usa ang napusilan, 8 sikop sa drug bust

CEBU, Philippines - Grabeng naangol ang usa sa duha ka gipasanginlang pushers sa gihimong buy bust operation sa District 4 sa Barangay Pulpogan, Lungsod sa Consolacion ug laing walo ang nadakpan sa managlahing buy bust operations sa kapolisan sa Dakbayan sa Lapu-Lapu ug Talisay.

Si Chief Inspector Gerard Ace Pelare, hepe sa Consolacion Police Station miila sa napusilan nga mao si Janus Cabaluna Vestil human giingong mibunot og armas nga .38 kalibre rebolber hinungdan nga napusilan.

Nadakpan usab si Dennis Arroyo Tito, 43, District 5  mao gihapong lungsod. Si Pelare miingon nga si Vestil miibot og armas pagkamatikod sa mga polis apan swerte nga walay naigo ug dali nga nailog ang gihuptan niining armas.

Samtang tulo usab ang nadakpan sa kapolisan sa Presinto 2  sa Lapu-Lapu City Police Office (LLCPO)  nga sila si Randy Barrel  Iyas, 30, Jousue Bayot Mag-usara, 39 ug Elton Jhon Maloloy-on, alyas Polarm, 23.

Nakuhaan og tulo ka medium size nga paketeng shabu, lima ka gamay nga paketeng shabu ug ingon man unom ka gagmay nga paketeng shabu, ug P300 nga marked money.

Nadakpan sab sa mga sakop sa Mactan Police Station sa  Sitio Matumbo, Barangay Pusok sila si Michael  Caburnay, 19,  ug Wilfred Cabatingan, 39, nga nakuhaan og 23 ka gagmay nga  paketeng  shabu, P300 nga marked money.

Dugang nadakpan sa  Presinto 5  sa Mandaue City Police Office (MCPO) mao sila si Reynante Sepe Baclohan, 35, nakuhaan og 14  ka gagmay nga paketemg shabu ug buy bust  money nga P300.

Sa pikas bahin, hapit P64 mil nga gidudahang shabu ang nasakmit sa operasyon sa Sitio Lower San Roque, Barangay Calamba sa dakbayan sa Sugbo niadtong Huwebes sa gabii.

Si Leo Gutas Talledo alyas Lee, 37, naaktohang naghupot og 10 ka gagmay nga paketeng gidudahang shabu, usa ka medium-size nga pakete sa gituohang shabu,  usa ka itom nga coin purse ug usa ka medium-size transparent plastic pack nga sudlanan sa mga pakete sa shabu.

Sa Talisay City, nadakpan ang managsuon ug laing usa diha sa Lower Candulawan niadtong Huwebes sa gabii nga sila si Alexander Cartagena alyas Negro, 59; Fe Cartagena, 57; ug si Richard Tampon alyas Bebot, 30. Si Tampon nasakpang naghupot og 10 ka gagmay nga paketeng gidudahang shabu.

Gikaingon nga dili gyud siya maoy target sa buy bust operation apan natayming lang nga nakit-an siya sa otoridad hinuon nadakpan ilang tuyo nga si Cartagena ug ang iyang igsuon nga nakuhaan og 20 ka gagmay ug tulo ka medium nga pakete sa shabu nga mibalor tanan og P115 mil. (Gabriel Bonjoc, ug Kathleen Kaye G. Gonzaga, CNU Intern/IBM) (BANAT NEWS)