Motorsiklo nagbangga sa Compostela, usa patay

CEBU, Philippines - Usa patay sa panagbangga sa duha ka mga motorsiklo sa barangay Estaca, lungsod sa Compostela niadtong Domingo sa alas onse sa gabii. Ang nakalas giila sa Catmon Police Traffic Division nga si Denmark Diapuez,  taga barangay Cawayan, lungsod sa Liloan, samtang ang nangaangol nga nakabangga niini giila sab nga si Marlon Panibon,42, ug ang angkas nga si Elden Sabilla, 29, nagpuyo sa barangay San Jose, Catmon.

Matud pa ni Senior Police Officer 1 Arthur Ariate, si Diapuez paingon ngadto sa norte samtang kasugat niini silang Panibon paingon sa Dakbayan sa Sugbo. Pag-abot sa kurbadahong dalan nagkasungag gyud ang duha ka motor. Dali nga gidala sa Danao District Hospital ang tulo apan giingong gideklarar nga patay si Diapuez.

Matud ni Ariate sa Banat News parehong naka-inom og ilimnong makahubog ang duha ka habig.Pasakaan og kasong reckless imprudence resulting to homicide si Panibon. (/IBM)(BANAT NEWS)