Comelec gun ban sugod karon
CEBU, Philippines - Kasado na ang COMELEC (Commission on Election) sa gun ban sugod karong adlawa sa pagsugod sa election period samtang ipatuman na usab nila ang lahugay sa mga election officers sa Sugbo.
Ang direktor sa Police Regional Office 7 nga si Chief Supt. Robert Quenery miingon atol sa press conference nga pangusgan nila ang checkpoints sa tibuok rehiyon sugod karong adlawa.
Sugod karong adlawa hangtod na sa adlaw sa piniliay sa Barangay ug Sangguniang kabataan karong Mayo 21 ang election period sa tibuok nasud.
Si Cebu City Police Office (CCPO) director Senior Supt. Joel Doria miingon nga ang nausab lang sa ilang regular nga checkpoint mao ang signboard diin nakabutang ngadto nga, COMELEC checkpoint nga dunay pangalan sa opisyal sa polis nga nangulo sa maong checkpoint ug ang pangalan usab sa Election Officer nga atoa usab sa maong checkpoint.
Gidid-an ang si bisan kinsang magdala og armas bisan pa man kadtong adunay permit to carry firearms kon wala silay exemption gikan sa Comelec. Samtang ang mga polis kinahanglang mokuha gyud og Certificate to Bear Arms aron sila makadala sa ilang armas kon mo-duty.
Sa pikas bahin, adunay minor revamp nga ipahigayon ang Comelec sa upat ka election officers sa tulo ka dagkong dakbayan sa probinsya sa Sugbo.
Matud ni Atty. Lionel Marco Castillano, ang provincial election supervisor nga ang Comelec-7 adunay nipagawas og memorandum pag-revamp sa mga Comelec officials sa dakbayan sa Sugbo, Mandaue ug Talisay sugod kagahapong adlawa.
Si Atty. Marchel Sarno ang election officer sa Cebu City North district anaa na karon sa Comelec Talisay, siya gihulipan ni Atty. Gallardo Escobar nga gikan sa Talisay.
Samtang nagbaylo usab sa pwesto sila si Atty. Ann Fleur Gujilde sa Mandaue Comelec ni Atty. Edwin Cadungog sa Cebu City South District. Posible usab mag- revamp sa probinsya ilabi na kadtong dunay mga paryenteng mokandidato.Matud ni Castillano human sa eleksyon ibalik ra sila sa ilang mga pwesto. (Le Phyllis F. Antojado/IBM) (BANAT NEWS)
- Latest
