Nakadugang sa traffic

Dili gyud maayo ang gibuhat sa mga polis nga nadestino sa Waterfront Police Station, ang Station 3 sa Cebu City Police Office (CCPO), nga gihimo nilang parking area ang karsada atubangan sa ilang police station.

Ambot og ngano nga wala man usab magpakabana ang kadagkoan sa CITOM kabahin niini? Ang Waterfront Police Station adunay parking area nga anaa kilid sa police station.

Dili na gyud angay nga gamiton pa nila ang karsada atubangan sa ilang police station isip parking area. Gani, ang mga polis nga nadestino diha dili gani magpakabana nga makasinati og traffic ang maong lugar.

Tinuod, ang pagdumala sa traffic trabaho kana sa mga polis nga nadestino sa Traffic Group ug CITOM, apan siyaro na man usab, nga ang mga polis nga walay trabaho dili gyud makatabang?

Unya, gawas nga naghinan-aw lang sila sa grabeng problema sa traffic atubangan sa ilang police station, gihimo pa gyud nila nga parkingan sa ilang mga sakyanan ang karsada? “Pagkaluslos” gud ninyo.

Maayo unta og tagdon kining maong isyu ni Isko Ouano, ang operations chief sa CITOM, ug ni Mayor Tomas Osmeña kay gusto man kaha ninyo nga masulbad ang problema sa traffic.

Dili ba kamo mauwaw nga inig-abot sa mga taga laing lugar dinhi sa atong dakbayan, agi diha sa pantalan, maoy mosugat kanila ang makalilisang nga kahuot sa mga sakyanan?

Unya, gibutangan pa gyud sa CITOM og puthaw nga railings ang tunga sa karsada dapit sa eskina, nga nagpasabot nga kadtong mga sakyanan nga gikan sa Mariner’s Court Hotel, kinahanglan pa nga motuyok paingon sa “gate” sa pantalan aron mogawas.

Wala gyud moabot sa hunahuna sa kadagkoan sa CITOM nga ang tukma unta nga buhaton mao ang pagbutang og “junction box” atubangan sa police station aron nga dili kanunay’ng ukopahon sa mga sakyanan ang gibadlisan nga karsada.

Ang tumong niini aron nga ang mga sakyanan sa kapolisan makagawas dayon kon may dinalian nga respondehan, ug makagawas sab dayon ang mga sakyanan nga gikan sa hotel. Bi, hinuktuki kuno ninyo pag-ayo diha sa CITOM.

* * *

Gipaadtoan nako og mga reporter ang opisyal sa Barangay Kamagayan nga gipasanginlan nga operator sa illegal swertres, apan dili man kuno motubag sa isyu.

Ngano kaha no? Ugma na lang nako kini hisgotan kay gamay na lang ang nahibilin nga luna sa atong lindog. Hinganlan na nako kon kinsa ang opisyal sa Barangay Kamagayan nga gipasanginlan nga illegal swertres operator.

Kon madala pa, apilon nato paghisgot ang illegal swertres sa Barangay Guadalupe, Pasil ug Suba.