Mangwartahay nga enforcers gireklamo

CEBU, Philippines — Gipasanginlan sa mga drayber sa traysikol sa Siyudad sa Talisay ang mga sakop sa City of Talisay-Traffic Operation Development Authority (CT-TODA) nga kusog mangwarta.

Kini atol sa panagtagbo sa kahugpongan sa mga drayber sa pangulo sa CT-TODA nga si Engr. Keith Almond Dela Peña ug retired general Cecil Ezra Sandalo, kinsa consultant ni Mayor Eduardo Gullas sa peace and order.

Gipaabot sa mga drayber nga ningminus gyud ang ilang kita sa pagpamasahero dihang naa na sila sa temporaryong parkingan.

Una nilang gihulagway nga rason mao nga ang traysikad padayon pa kining namasahero sa karsada gawas sa parking lot.

Ikaduha mao nga ang mga jeepneys dili na mosulod sa parking lot diin diha na lang sa karsada mopakanaug sa mga pasahero nga sugaton sab sa mga traysikol nga naa sa gawas.

Gidili na unta kini apan padayong gibuhat ug nipasangil nga ang mga traysikol drayber nga dili madakop ang mga gahi og ulo tungod kay mohatag man og kwarta sa mga sakop sa CT-TODA nga nadestino sa lugar. Gumikan sa paghatag og salapi hayan libre na ang mga drayber nga dili mosulod sa parking lot nga mokuha og mga pasahero.

Laing reklamo sa mga drayber mao ang kalapokon sa parking lot nga maoy rason nga dili na mosulod ang mga pasahero.

Si Dela Peña nipasalig nga iya kining aksyonan ang taho ug iyang gibutyag nga kuhaon gyud sa mga reklamante ang impormasyon sa sakop sa CT-TODA nga mangwartahay.

Si Sandalo niingon nga wala’y luna sa ilang administrasyon ang kurakot nga enforcer maong angay sila ilisan o taktakon kon mapamatud-an. (GMR) (BANAT NEWS)