Romeo, Yap tinguhang mopalagpot ni Maliksi

CEBU, Philippines — Duha ka mga banggiitang shooters sa PBA ang gusto mopalagpot sa trono ni ‘Three-Point King’ Allein Maliksi  sa 2018 PBA All-Star Challenge sa Mayo nga magsugod didto sa Batangas City.

Sama sa miaging tuig, katulo ipahigayon ang PBA All-Star  ug gawas sa Batangas, ang laing mo-host mao ang Iloilo ug Davao.

Usa ang three-point shootout sa mga atngan diin si Maliksi sa Blackwater Elite gusto mopamatuod nga siya ang ‘3-point king’ sa liga.

Kinahanglan hinuon siya mokayod aron mapanalipdan iyang titulo tungod kay gusto nila ni Terrence Romeo sa TNT KaTropa ug James Yap sa Rain or Shine Elasto Painters  motilaw pag-usab sa maong korona.

Gawas sa duha ka kanhi 3-point king, moapil sab sila si JV Casio sa Alaska Aces, LA Tenorio sa Barangay Ginebra, Stanley Pringle sa GlobalPort Batang Pier, Larry Fonacier sa NLEX Road Warriors, Marcio Lassiter sa San Miguel Beermen ug Matthew Wright sa Phoenix Fuel Masters.

Gawas sa 3-point shootout, aduna sa’y Obstacle Challenge ug Slam Dunk showdown.

Mahimong highlight sa All-Star mao ang sangka sa Gilas Pilipinas ug  All-Star selection nga ipahigayon sa tulo ka mga dapit.