Premyo sa Sinulog kuwangan?

CEBU, Philippines — Laing isyu na usab ang mitumaw may labot sa Sinulog Festival 2018 human midangop diha sa Cebu City Hall ang asawa sa usa sa mga mananaog sa puppeteer category tungod kay giingong kuwang ang premyo nga ilang nadawat.

Si Analyn Cuyos, 28-anyos, residente sa Barangay Kamputhaw, dakbayan sa Sugbo nagkanayon nga siya ug iyang bana miapil sa puppeteer competition sa Sinulog Grand Parade karong tuiga diin ang ilang obra nga si ‘bumblebee’ nalandig sa ikatulong pwesto ug duna kini premyo nga P30,000.

Matud ni Cuyos nga niadtong Enero 21 nadawat nila ang premyo ug base sa certificate nga ilang nakuha P30 mil ang ilang premyo apan ang nakabutang sa tseke nga ilang gikuha P20 mil lang hinungdan nga nangutana sila ngadto sa Sinulog Foundation, Inc. kabahin iini.

Giingong gikan sa  buwan sa Pebrero hangtud karon wala pa nila makuha ang kuwang sa premyo ug kanunay lang silang gipasaligan hinungdan nga midangop na sila kang Mayor Tomas Osmeña                                       

Nasayran nga niining tuiga ang ikaduhang higayon nga miapil ang mga Cuyos sa kalihukan sa Sinulog ug sila ang giswerte nga makadaog.

Si Cebu City Mayor Tomas Osmeña sa iyang bahin, miawhag kang Cuyos nga magpadala og suwat ngadto kaniya tungod kay buot sa mayor nga matubag ang mga reklamo may labot sa Sinulog.

Ang executive director sa SFI Ricky Balleteros mipasabot nga ang giimprinta ug gihatag ngadto sa mga partisipante ang bag-ong premyo nga gi-umentohan tungod kay gi-require man sila nga mobayad og registration fees.

Dugang ni Ballesteros ang in-charge sa prizes giingong wala mapahibawo maong gigamit lang gihapon nila ang karaan.

Si Jess Anthony dela Cruz, program director sa Sinulog Festival 2018 miasoy nga gilihok na nila ang maong problema diin nakig-alayon na siya sa City Budget Officer aron ang kuwang nga P10,000 mahatag ngadto kang Cuyos. (BDB) (BANAT NEWS)