Na-impound nga truck gibuhian

CEBU, Philippines — Gipagawas na ang 40 ka dagkung sakyanan nga na-impound sa South Road Properties human hatagi ni Cebu City Mayor Tomas Osmeña og amnestiya niadtong Martes.

Sagad sa mga sakyanan nga gi-impound sa Anti-Mining Local Enforcement Task Force (AMLET) nga gipangulohan ni Kevin Crister Paz mao ang mga 6-wheeler ug 10-wheeler trucks tungod kay wala kini delivery receipt ug hauling permit.

Ang multa nagkantidad og kapin P2,700 ug P500 nga bayad matag adlaw sa pagpundo sa impounding area.

Matud ni Paz nga sa sunod nga madakpan ang maong mga sakyanan dili na kini ipagawas ug itanggong kini og pipila ka buwan.

Ang mga sakyanan nadakpan niadtong Marso samtang apil nga nahatagan og amnestiya ang mga sakyanan nga nadakpan sa Abril hinungdan nga nahatagan kini og sayo nga pagpagawas.

Dugang ni Paz nga ang mga sakyanan nga madakpan sugod kagahapong adlawa dili na maapil sa amnestiya.

Si Osmeña nihatag og amnestiya aron paghatag og mas dakong lugar alang sa mga sunod nga sakyanan nga madakpan. (Erly Ann Alcontin, CNU Intern/GMR) (BANAT NEWS)