Laing 15 ka kawani sa CH positibo sa ilegal nga druga

CEBU, Philippines — Kinse ka kawani sa Cebu City Hall nga nadestino sa Department of Engineering and Public Works (DEPW) nahibaw-an nga mga tiggamitan og gidiling drugas atol sa kinalit nga drug test niadtong Martes.

Si Garry Lao, pangulo sa Cebu City Office for Substance Abuse Prevention (COSAP), miingon nga ang 13 mga tiggamitan og shabu, samtang ang duha mogamit gyud og shabu ug marijuana.

Matud ni Lao nga karong adlawa mosumiter siya og report ngadto ni Mayor Tomas Osmeña nga magrekomendar nga taktakon ang mga kawani nga kaswal, ug imbestigahon ang mga regular.

Si City Engineer Kenneth Carmelita Enriquez nga maoy pangulo sa DEPW, nasagmuyo kaayo sa pagkasayod nga daghan sa iyang mga sakop ang mga adik.

Matud ni Enriquez nga ang maong mga kawani mao ra ang mabasol kon mataktak sila sa trabaho kay gilapas nila ang pagbaod nga dili gayud mosulod sa bisyu sa drugas.

Tungod sa pagkapositibo sa 15 ka kawani sa DEPW, miabot na og 32 ka kawani sa City Hall ang namatud-ang adik. Pipila ka semana ang milabay, 15 usab ka sakop sa civilian security personnel ang napositibo sa drug test.

Ang laing duha ka adik mga kawani gikan sa ubang departamento sa City Hall. Ang mga kawani nga nahimoan na og drug test nadestino sa COSAP, Accounting Office, Management Information and Computer Services (MICS), City Planning and Development Office, Human Resource Development Office (HRDO), Budget ug Division for the Welfare of the Urban Poor (DWUP). (Jhan Nysse Capus/CNU Intern/RUB) (BANAT NEWS)