Cavs misakmit central division title

CEBU, Philippines — Mibadlis sa ika-50 nilang daog ang Cleveland Cavaliers ug nabira ang Central Division title dihang ilang gilubong ang New York Knicks, 123-109 sa NBA kagahapon didto sa Madison Square Garden sa New York.

Si Lebron James miburak og 26 puntos ug 11 ka assists, samtang si Kevin Love mibahog og 28 puntos sa Cavaliers  nga nakaabot og 50 ka daog sa ikaupat nga sunod-sunod nga season sukad si James mibalik sa ilang poder gikan sa Miami Heat. Si James mitala sab og rekord nga 10 ka sagunson nga division  titles sa Cleveland ug Miami.

Gawas niini, ang Cavs misikit sab og maayo sa Philadelphia 76ers alang sa ikatulong puwesto sa Eastern Conference.

Sila si J.R. Smith ug Jordan Clarkson mitali og 16 puntos matag usa alang sa Cavaliers nga miposa og 19 ka tres dayon na ngadto sa paglansang sa ikasiyam nilang sunod-sunod nga daog didto sa Madison Square Garden.

Sa uban pang mga resulta,   ang  San Antonio Spurs ug  ang Oklahoma City Thunder naghudyaka sab human  milabnot og luna sa playoffs.

Si Rudy Gay dunay 18 puntos, samtang si Manu Ginobili miamot og 17 puntos sa dihang ang Spurs  milusad og mainit nga rally aron pagpatikyaob sa Sacramento Kings, 98-85.

Ang Kings nga natagak na sa playoffs niadtong Marso 11, naglabaw og 14 puntos sa wala pa gikastigo sa Spurs sa katapusang kuwarter, 38-19.

Sila si Gay, Ginobili ug Bryn Forbes nagkumboya’g 25 puntos sa nagkayong rally sa Spurs. Si Forbes mitapos uban ang 11 puntos, samtang si LaMarcus Aldridge midonar og 15 puntos ug 14 ka rebounds.

Sa pikas bahin, si Paul George mipupo og 27 puntos ug si Russell Westbrook mitali sa ika-25 niyang ‘triple-double’ karon nga season aron pangulohan ang Thunder paglubong sa Miami Heat, 115-93.

Si Westbrook mitapos uban ang 23 puntos, 18 ka rebounds ug 13 ka assists alang sa Thunder nga nasipyat sa nag-una nilang 10 ka itsa ug naalkansi og 18 puntos sa sayong bahin sa duwa, apan nagmangtas  sa katapusang kuwarter, 39-12 aron sa pagpabugnaw sa Heat.