32 armas sa Tuburan gi-surender ngadto sa polis

CEBU, Philippines — Niabot sa 32 ka armas ang gi-turnover sa Tuburan Police Station sa gipanghingusgang kampanya batok sa paghupot og dili lisensyado ug rehistradong armas.

Sa pagpakighinabi ni Police Supt. Melbert Glade Esguerra, hepe sa Tuburan PS, sa mga barangay kapitan sa Lungsod sa Tuburan niadtong Huwebes atol sa binuwan nga tigum sa Liga ng mga Barangay, giawhag ang mga kapitan nga mohatag sa ilang suporta batok sa kampanya.

Kini aron mopatigbabaw ang kahapsay, kalinaw ug seguridad sa umaabot nga Mayo 14 nga Barangay ug Sangguniang Kabataan elections.

Isip tubag sa hagit sa hepe, 32 ka long ug short loose firearms ang gi-turnover sa Tuburan PS nga gipangulohan ni Mayor Democrito Diamante ug Bise Mayor Danilo Diamante.

“Angayang suportaan ang mga programa sa gobiyerno kay kini para sa kaayuhan sa katawhan. Labi na g’yud ning paghupot sa armas nga walay rehistro, ug karon nga umaabot pud ang election sa Barangay ug SK. Mas maayo nga makalikay ang mga anaa sa katungdanan nga makabuhat og kasaypanan. Hinaut pa nga sa among gibuhat karon, mosunod pud ang atong mga kauban sa komunidad,” matud ni Mayor Diamante.

Si Esguerra sab nanawagan sa aduna pay mga armas nga dili rehistrado ug walay lisensya nga i-turnover sa labing duol nga police station aron makalikay sa disgrasya ug kaso.

Dako ang pasalamat sa  hepe ngadto sa mayor, bise mayor ug sa pangulo sa Liga ng mga Barangay nga si Kapitan Wilfredo Diamante ug sa tanang kapitan nga nihatag sa ilang suporta ug dali kaayong pagtubag sa hangyo ug hagit sa kapolisan. (BANAT NEWS)