Canelo positibo sa ginadiling droga

CEBU, Philippines — Si middleweight boxer Canelo Alvarez nagpositibo sa usa ka matang sa ginadiling droga ug ang iyang mga promoters mibasol sa daotan nga karne isip maoy hinungdan niini.

Basi sa resulta sa boluntaryong drug test, si Alvarez nagpakita og timaan nga dunay clenbuterol sa iyang sistema. Sagad gamiton sa mga hubakon, ang clenbuterol dali makapahilis sa tambok ug makapakunhod sa timbang niadtong mga tiggamitan niini.

Apan sa opisyal niining pamahayag, ang Golden Boy Promotions mipadayag nga ang gidaghanon sa nakita nga clenbuterol sa lawas ni Alvarez pareho niadtong nakakaon og kontaminadong karne nga nakaapekto sab sa mga atleta didto sa Mexico ug China.

Gidasonan kini ni Daniel Eichner, ang director sa World Anti-Doping Agency (WADA)-accredited laboratory nga maoy mipahigayon sa eksaminasyon ni Alvarez.

“These values are all within the range of what is expected from meat contamination,” matud pa ni Eichner.

Si Alvarez kasamtangan nga nangandam sa ilang rematch ni middleweight champion Gennady Golovkin nga gikatakda karong Mayo 5 didto sa Las Vegas. Nagtabla ang duha sa una nilang bugno niadtong Septiyembre sa miaging tuig. (BANAT NEWS)