MTK Ipasalida nationwide karong Marso 7

CEBU, Philippines — Padayon gyud ang paglawig sa binisaya nga lilas gumikan kay mapagawas na nationwide ang gibidahan nga pelikula sa online sensation  nga si Rowell Ucat o naila isip si Medyo Maldito,  kauban niini ang kanhi Star Power finalist nga si Akiko Solon. Kini mao ang romantic-comedy film nga nag-ulohan og “Magbuwag Ta Kay”.

Ang maong lilas  una na nga nipahigayon og mga  advance screening sa miaging tuig  dinhi sa Sugbo human kini gisuportahan sa VIVA Films ubos sa pagpangusog ni  Verb Del Rosario, Vice President for Operations of VIVA South .

Ang producer sa “Magbuwag Ta Kay” nga si Sunshine Lim kinsa pangulo sa Heritage Productions una nga miingon nga karong tuiga gyud nila ang target nga pagpasalida niini.

Sa presscon niadtong Huwebes  nga gipahigayon sa  Manang Juling’s Kilawan , gibutyag ni Lim nga mahinayon na ang pagpasalida sa pelikula nationwide sugod karong Marso 7, 2018 sa SM Cinemas .

Ang maong nationwide screening sa “#MTK” inabagan gihapon sa VIVA Films.

Dakong pasalamat ni Lim gumikan kay wala nila damha nga mahitabo gyud  ang maong nationwide screening .

Nasayran nga kapila gyud nauswag ang pagpasalida niini.

“Grateful kaayo ta nga ang bisaya films ilabi na ang #MTK kay gibira ta sa VIVA para mapakita ta nationwide. Grateful ko nga mapagawas ni sa pinakadako nga mall sa nasud. And I am confident nga hangupon ni sa kadaghanan kay sa nahitabo sa advance screenings, daghan kaayo ang mitan-aw ug mitambong”, padayag pa ni Lim.

Ang “#MTK” ubos kini sa direksyon nila ni Janice Perez ug RJ Aquino.

Nakaingon usab si Lim nga mas kompyansa siya nga daghan ang mohangop sa maong lilas gumikan kay ang mga napilian nga mohatag og kinabuhi sa istorya aduna sab gyuy mga kasinatian sa pag-arte ug adunay mga igong katakus nga maibuga bisan og gawas na sa kamera. Dugang pa nga pipila sa ilang mga ilang napiliang artista ilado na.

Sama nila ni Dante Luzon kinsa naila isip broadcast-journalist dinhi sa Sugbo. Si  Professor Ligaya Rabago kinsa naila sa kamaayo  niini moarte ug nakagama na og pipila ka mga lilas didto sa kaulohan. Si Rio Delizo mao usab karon ang usa sa mga maayong direktor ug aktor kun diin nakaangkon na og pasidungog ang pipila sa iyang mga ginamang pelikula. Nalakip pud ang laing  online sensation nga si Snake Princess ug ang Ukay-Ukay Diva nga si Alem Garcia .

Ubang cast sa pelikula mao ang mga Sugbuanon nga rising stars nga sila si, Denise Tan, Gio Miang, Samantha Midel, Chris Paglinawan ug Shawna Irizari.

Gidapit sab ni Akiko ang tanan ug imbitaron ang mga higala sa pagsaksi pagbalik sa pelikula gumikan kay talagsaon lamang ang maong binisaya nga pelikula ug gani, mas angay na sab nga manikaysikay na pagsugod sa paglawig ang mga binisaya nga lilas.

“Gihatag gyud namo ang tanan namong effort, tanan namong emotions para mo malingaw ug ma-enjoy mo. Mayta maganahan gyud mo ug balikon ninyo pagtan-aw. It is also a great opportunity and overwhelming sab kay nasuportahan ta og dako na film company. Kita mga Bisaya, kahibalo ko nga kita ra man gyud ang magtinabangay ug magsinuportahay mao magpasalamat sab ko ninyo kay naa mo diri karon and to help us spread the film”, padayag pa ni Akiko.

Niadtong Huwebes sa gabii, gisugdan na sab sa cast ug crew ang Twitter party aron sa pagpa-trending sa #MTK kun diin gipaagi kini nila og countdown una mahitabo ang nationwide screening.

Daghang pagtulun-an ang makutlo sa mga tumatan-aw gikan sa maong pelikula gumikan kay nagtuki kini kabahin sa pamilya relasyon, panaghigalaay ug pangandoy.

“Hopefully tagaan og pagtagad sa mga tawo ug pangitaon nila and they will watch this because they want to. Bisan og gamay lang ang budget ang film and got it from my family’s pocket, dili kini sukaran nga mo-surrender ta kay kahibawo man ko ug daghan sab ang nituo nga ang binisaya nga film makahatag og hustiya ug makahatag og nindot nga outcome to all the viewers”, pulong pa ni Lim.

Gipasalig sab ni Lim nga kun unsa ang resulta sa nationwide screening, mopadayon gihapon ang Heritage Productions sa pagama og pelikula nga palawigon sab lukop nasud.

“This is an investment. Dili mahimong babag ang kapakyasan sa paghimo og pelikula. We will keep going. Hopefully ‘#MTK’ is well-received nationwide. Through this, gusto mi nga ang Cebuanos adunay lugar sa film industry dili lang diri sa Cebu, pero sa tibuok nasud”, pagtapos ni Lim.