Mga natural nga antibiotics (2)

Garlic (ahos) — Nagbaton ni’g natural sulfur compound nga ‘allicin’ nga nagsilbing natural antibiotics, sigun sa napatik sa 1999 Journal of microbes & infections. Aduna sab ni daghang bitamina ug minerales, nga makapahimsog sa panglawas.

Makatabang kini ilabi na sa pagpuo ug nga igawas ang mga binuhi sa tiyan (parasites) nga mosupsop sa mga sustansya sulod sa ginhawaan. Mokaon og 2-3 ka lusok sa ahos, sa dili pa ang naandang tingkaon. Mahimo sab nga iapil kini kanunay sa tanan nato nga mga pagkaon o pag-inom. Sa garlic supplement, kinahanglang isanghid una sa doktor o sa healthcare professional.

Raw honey (lab-as puro (pure) nga dugos) — Gikonsiderar kini isip usa sa epektibong natural nga antibiotics, nagbaton og elemento nga antimicrobial, anti-inflammatory, ug antiseptic. Sa pagtuon niadtong 2014 atol sa tigum sa American Chemical Society, nadiskubre ang ‘raw honey’ nga may katakus sa pagpakigbatok sa tanan nga lebel sa mga impeksyons.

Iseguro nga maoy gamiton ang organic ug puro nga dili kontaminado sa toksik kemikals, aron pagpuo ug dili mabuhi ang mga kagaw o mga bakterya nga mopainutil sa lawas. Sa laktud, ang ‘honey’ pampalig-on sab ni sa imyun nga dili kita basta madutlan sa mga balatian.

Mokonsumo niini kanunay sa sama nga gidaghanon sa honey ug cinnamon nga pinulbos (1;1 ratio), kausa kada adlaw nga isagol sa smoothie, duga (juices) o gi-blend ang lab-as nga prutas o utanon (fresh veggie/fruits).

Oregano oil (lana sa kalabo) — sa pagtuon niadtong 2001 didto sa Goergetown University, ilang nadiskubre ang kaepektibo sa lana sa kalabo batok sa mga tang-an na nga mga bakterya. Ang ‘carvacrol’ sa kalabo,  maoy responsable sa kaisog sa pagpakubos sa mga impeksyons, isip tradisyonal nga antibiotics. Nagbaton ni og antioxidant, antiseptic, anti-inflammatory, antiparasitic ug  pahupay sa panakit.