Transparency

Isip usa ka aktibong opisyal sa kooperatiba dinhi sa dakbayan nga mao ang Newscoop, naguol ko sa kasayuran nga dunay laing cooperative nga gikatahong naglaraw unta sa pagsuspenso sa ilang operasyon. Ang hinungdan tungod sa giingong kapakyas sa kanhi chairman sa maong kooperatiba pagsubmiter sa financial ug audited report sa ilang operasyon.

Ang PCL Coop Board mipasar og resolution niadtong Hunyo 13, 2017  nga nag-awhag sa kanhi chairman nga si Ivy Durano Meca pagtugyan sa tanang financial reports. Apan giingong bank book ra maoy gitugyan ni Meca ngadto sa bag-ong pangulo sa kooperatiba.

Matud sa board nga kuwang ang maong dokumento tungod kay buot nilang masayran kon giunsa paggasto ang ilang kwarta pinaagi sa audited financial report. Isip usa ka opisyal sa gobiyerno, angayang daygan ni Meca ang mga sakop ug opisyal sa ilang kooperatiba sa tanang gasto ubos sa iyang liderato.

Importante ang transparency sa usa ka opisyal aron dili maapektohan ang iyang kridibilidad, labi pa nga karon pangulo siya sa CPADAO, usa ka sensitibo nga buhatan sa Kapitolyo.

* * *

Kapin pa sa usa ka tuig una ang sunod eleksiyon, kana kon mahinayon sa sunod tuig, apan nagsugod na og bukal ang kawa sa politika dinhi sa dakbayan.

Si Mayor Tomas Osmeña mideklarar na nga mopapili siya pagbalik sunod tuig. Dili kuno niya mahimong ihatag og lain ang pwesto, labi pa nga sigurado siya nga dakong negosyante ang tinud-anay niyang kaatbang.

Wala sab magpauwahi ang kanhi mayor nga si Michael Rama. Gipahibawo sab niini sa miaging Biyernes ang iyang tinguha nga magpapili pag-usab pagkamayor. Matud hinuon niya nga posibleng magbise-mayor lang siya o ba kaha magkongresista, kon masuspenso si Osmeña.

Apan kon dili, mokandidato gyud siya pagkamayor bisan kon iya pa nga ikaatbang ang kauban niya sa ilang grupo sa Team Rama nga si Bise Mayor Edgar Labella.

Wala pa gyud intawon mosantop sa hunahuna ni Rama ang kamatuoran nga patay na ang iyang karera sa politika. Wa sab siya’y kasigurohan, bisan pa og magbise siya kon dad-on ba siya ni Labella tungod kay mag-agad ni sa hukom sa partido. Nakalimot si Rama nga si Labella sakop na sa PDP-Laban ug siya dili sakop sa partido.