Panagang sa TRAIN law

Sila si Senador Sherwin Gatchalian ug Bam Aquino miawhag nga ang kagamhanan mohimo’g mga lakang pagpanagang sa mga epekto sa Tax Reform for Acceleration and Inclusion (TRAIN) law. Si Gatchalian, isip chairman sa Senate committee on economic affairs, miaghat sa dali nga pag-implementar sa expanded cash transfer program alang sa labing kabus nga mga molupyo.

Samtang si Aquino namahayag nga gumikan sa TRAIN law, aduna siya’y nadunggan nga mga business process outsourcing companies, o mga  call centers nga naglaraw pagpanira o pagbalhin sa ilang operation.

Hinaot nga dili kini mahitabo sa atong nasud, ilabi na dinhi sa atong dakbayan nga daghan kaayong mga call centers, nga kon mahitabo man kini, daghan kaayong mga trabahante ang mawad-an og trabaho.

Earlier, ang grupo sa mga walhon, nagprotesta sa miaging semana didto sa kaulohan ug miawhag nga inay tax increase, wage increase unta ang paningkamotan sa kagamhanan.

Awhag nila ni Gatchalian ug Aquino, “to immediately implement buffer measures to soften the blow of a rapid rise in commodity prices and service fees”  gumikan sa TRAIN law.

Ang naapektohan niini pag-ayo mao ang low income group nga matud pa, misamot paggamay ang ilang ‘take home pay.’ Samot ang mga wala’y income. Kon buot hunahunaon, mao kini ang labing dako nga problema sa atong nasud, ang poverty alleviation.

Hinumdoman nga ang mga nangaging administrasyon, silang tanan mideklarar og pakiggubat batok sa kawad-on, war against poverty.

Pilde silang tanan.

Hinaot nga magmadaugon kita karon niining atong pakigbugno batok sa kawad-on. Lagmit kon modaog kita niini, modaog usab tingali kita niining war against drugs.

* * *

Sa kaulohan, sige man sila og panakop sa mga nagmotorsiklo nga dili magsulb-ob og helmet. Dinhi sa ato gipasagdan man lang ni sa atong mga law enforcers. Ang Republic Act No. 10054, o ang Motorcycle Helmet Act of 2009, nagmando sa pagpasul-ob sa helmet, both sa nag-drive ug sa nagsakay sa likod.

Ang record sa MMDA sa tuig 2016, ang reckless motorcycle riding mao ang numero uno nga hinungdan sa pagkamatay ug pagkaangol sa kadalanan sa Metro Manila.

Sa Quezon City, usa ka babayeng backrider ang gidakop sa mga enforcer sa MMDA gumikan sa wala pagsul-ob og helmet.

Ang helmet iya ra nga gigamit isip food basket, gisudlan sa kinompra. Dunay naka-video, ug gi-post sa facebook. Nakita nga nasuko ang babaye ug iyang gihapak sa helmet ang MMDA enforcer ug ang nikuha sa video.

Earlier, gi-flag down ang duha gumikan sa maong kalapasan. Ang multa: P6,000.