Kelot namboso, binoga

MANILA, Philippines — Bumulagta ang isang 36-anyos na binata matapos mapuruhan ng boga sa noo habang sinisilip mula sa bintana ang kalaguyo ng kanyang kapitbahay sa Brgy. Dalaoig, Alcala, Cagayan noong Sabado.

Kinilala ni SPO3 Darcoin Callano ang napatay na si Joel Caraang habang ang suspek na sumuko matapos ang krimen ay si Rolando Casay, 40.

Lumalabas sa imbestigasyon na naburyong si Casay sa malimit na paninilip sa bintana ni Caraang sa kanyang 21-anyos na kalaguyo na umano’y dating nobya ng huli.

Idineklarang patay si Caraang sa Alcala District Hospital habang isinuko naman ni Casay ang cal. 38 rebolber na paltik na ipinangtumba niya sa karibal.