Palpak sa mayor, building owner hasolon

Gimandoan ni Mayor Tomas Osmeña ang Office of the Building Official (OBO) nga hunongon una ang pagpang-aprobar sa mga building permit sa mga high-rise building sa siyudad sa Sugbo, hangtud nga maestablisar ang safety standards alang nianang mga tag-as nga edipisyo.

Dalaygon unta ang ingon niining mga buhat tungod ug alang sa seguridad sa katawhan ug sa mga kabtangan (lives and limbs). Ang mando sa mayor gipagawas human sa sunog sa Metro Ayala nga milanat og tulo ka adlaw ang pagpalong sa kayo.

Sa mga balita, giangkon sa kabomberohan nga naglisud sila sa pagpalong sa kayo, mao nga nalangan gyud ang pagpakigbugno nila niini.     Tinuod nga dakong problema ang atubangon kon adunay masunog nga tag-as nga edipisyo dinhi sa Sugbo. Kon ang sunog anha magsugod sa first ug second floor, sayon lang kining palungon sa mga bombero. Kon sa third floor ngadto sa fourth floor, medyo kaya pa nila kini.  Apan kon adto na sa fifth floor, mura’g maglisod na sila.

Para nako, dili safety standards sa mga edipisyo ang isyu, kon adunay manghitabong sunog, kon dili, ang kapabilidad sa kabomberohan sa pagpalong sa kalayo. Kon masunog ang ikaunom ngadto na sa mas taas pa nga ang-ang sa edipisyo, walay tag-as nga hagdanan ug ubang kahimanan nga magamit ang kabomberohan aron maabot nila ang andana nga tua ang kayo.

Pananglit maka-abot na ang mga bombero sa andana nga tua ang sunog, nagkinahanglan sila og breathing apparatus aron makaginhawa ang mga bombero inig-atubang na sa kayo ug heat-resistant jacket aron magprotehir sa lawas sa mga bombero.

Ang boom truck, hagdanan, breathing apparatus, ug heat-resistant jacket sa mga bombero, mga problema kini nga ang gobiyerno maoy angayan mosulbad. Unya, nganong silotan man ni Tomas ang mga tag-iya og high-rise building aron kunohay sulbaron una ang safety measures sa maong mga edipisyo? Dili ba kaha lipat-lipat kining iya kay sukad pa sa 1987 nga si Tomas nga nahimong mayor sa siyudad sa Sugbo apan wala gyud siya makatagad pag-abag sa kapabilidad sa kabomberohan sama sa mga kahimanan niini?

Sa ubang mga siyudad, nindot na kaayo og mga firetruck. Gani, sa Catarman, Northern Samar, didto ko makakita og mga moderno nga firetrucks nga wala gyud nako makit-i dire sa siyudad sa Sugbo. Ang mayor adunay responsibilidad paghatag og ekipo sa kabomberohan ug kapolisan. Trabaho kini nga palpak sa siyudad sa Sugbo.

Kon wala’y kuwarta, mahimong mangayo sa national government. Ning maong palpak ni Tomas, ang mga tag-iya og edipisyo ang iyang hasolon. Tay’m pa, dili ba kaha mahimo na usab kining bangag aron ang mga kanahan diha sa Cebu City Hall makakangkang sa mga tag-iya sa high-rise building bugti sa pagpalusot sa building permit?