Sintomas sa diabetes

CEBU, Philippines — Ginatawag sa kadaghanan ang sakit nga diabetes isip "silent killer” gumikan kay mao kini ang matang sa sakit nga dili gyud masayran kon nataptan na diay ang usa ka tawo.

Dili gyud kini dali nga mailhan gumikan kay dili gyud nato mamatngunan kon walay pahibalo gikan sa mga gisaligang doktor.

Mao nga karong sayo-sayo pa, angayan nga magpakonsulta na sa doktor ilabi na kadtong mga tawo nga punay og panguhit sa pagkaon og tam-is niadtong Pasko.

Gani, kining matang sa sakit walay makalingkawas niini gumikan kay ang atong mga kinaon sa matag adlaw adunay sagul nga tam-is.  Nagbaha ang kan-on, pan, kendi, cake, ug uban pa ang  giandam niadtong Pasko.

Alang usab sa kasayuran sa uban, ang tawo nga mas makabaton og sakit sa diabetes mao kadto ang magpalabi sa sugar-intake sa lawas.

Apan wala usab gisugyot nga likayan ang pagkaon og tam-is gumikan kay dili sab mahimo nga dili balanse ang atong kinaon sa lawas. Ang tawo nga kuwang og sugar sa lawas maoy adunay sakit sa bato.

Suma pa sa www.dailyentertainment.me nga ang tawo nga positibo sa sakit nga Diabetes adunay problema sa panan-aw, adunay kidney disease. Gani, mohatod sab kini sa sakit sa kasingkasing ug stroke.

Ang matala sa ubos mao kini ang dugang mga sintomas nga angay natong bantayan sa matag usa kanato.

• Kanunay nga pag-ihi-ihi o kanunay nga bation og kaihion

• Kanunay nga uhawon bisan og bag-uhay pa miinom og tubig.

• Mokunhod ang timbag o dili gyud mosaka ang timbang.

• Kanunay nga bation og kagutom

• Kanunay nga katol ang panit ilabi na inig human og kaon.

• Dugay maalim ang samad. Kanunay nga presko ang samad ug wala pa maayo sulod sa usa ka semana.

• Makabaton og fungal infections.

• Hanap ang panan-aw

• Maminhod ang mga tiil o ang mga kaunuran

• Kanunay nga bation og kabudlay

Kon ikaw anaa niining mga sintomas, angay nga magpakonsulta sa doktor. Pahimangno lang usab  nga mahimo lang gyud nga malikayan ang maong sakit pinaagi sa pag-usab sa lifestyle, dili pagpalabi sa pagkaon og tam-is, magtarong na sa pagbalanse sa kinaon ug ang pag-diet.