Daghan talawan og dagom sa Kapitolyo

CEBU, Philippines — Sa 3,000 ka empleyado sa Kapitolyo, 19 ra ang boluntaryong nidonar og dugo atol sa “Give Blood, Give Life” bloodletting program kagahapon nga gipangulohan sa Provincial Health Office hinungdan sa pagkadismaya sa maong buhatan.

Matud ni Jason Jose Dacua, med-tech sa PHO, nga kuwang gyud og kooperasyon gikan sa mga empleyado sa Kapitolyo diin gamay ra ang nidonar og dugo kagahapon.

Kini taliwala sa pagpahibawo kanila ug pinaagi sa mga posters tupad sa mga biometrics sukad sa niaging buwan aron seguro nga makita gyud nila ang pahibawo.

Sa 19 nga niboluntaryo, 14 ra ang malampuson nga nakuhaan og dugo kinsa ang lima wala nakuhai tungod kay mubo ang hemoglobin, taas og blood pressure ug mahadlok og dagom.

Matud ni Dacua nga anugon kaayo ang higayon nga makadonar og dugo ug makatabang niadtong nanginahanglan diin ang uban kinahanglan pa mobayad og libo para ma-test ug makadonar og dugo.

Sigun usab niya nga makita lang sa mga tawo ang importansya sa dugo kung sila na ang manginahanglan niini.

Ang dugo nga nakolekta sa PHO ipangapod-apod sa upat ka provincial hospitals sa Bogo, Balamban, Carcar ug Danao.

Apan dunay pipila ka bags sa dugo ang ibilin sa PHO alang niadtong manginahanglan sa siyudad apan prayoridad nila ang hospital sa probinsiya.

Nanghinaut ang PHO nga sa sunod daghan na ang modonar aron daghan sab ang matabangan nga pasyente. (BANAT NEWS)