‘Open bag’ policy ipatuman sa CSBT

CEBU, Philippines — Subling nipahimangno ang tagdumala sa Cebu South Bus Terminal sa mga gidili nga dad-on sa terminal atol sa ilang pagbiyahe.

Kini naglakip sa tanang klase sa pabuto, butane ug mga hait nga hinagiban.

Kung adunay pabuto nga dad-on mas maayo nga adunay certificate gikan sa Bureau of Fire and Protection aron dili kompiskahon sa nagbantay.

Matud ni Joey Herrera, manager sa CSBT, nga mas maayo sab nga ablihan daan ang mga bag sa dayon sulod sa terminal alang sa inspection aron dili na motaas ang linya.

Siya nipasabot nga ila gihapon ipatuman ang “open bag policy” sulod sa CSBT.

“Open bag policy man gyud ta, so ato pasabton sila nga kinahanglan na ablihon (ang bag) pahibaw-on daan nato atong hangyoon nga dili lang usa i-seal pag-ayo kay inig-abot sa terminal ato gyud na paablihan,” matud ni Herrera.

Karong Biyernes gipaabot nga magsugod pagdagsa ang mga pasahero aron mopauli sa ilang mga lungsod sa pagsaulog sa Pasko ilabi na nga mahulog nga long weekend sanglit ang Pasko natunong sa Lunes ug ang Martes, petsa 26, walay trabaho sa mga buhatan sa gobiyerno.

Matud ni Herrera nga nihangyo na sila sa Cebu Provincial Police Office og dugang polis nga mobantay sa terminal sugod sa Biyernes ug dugang blue guards sa Kapitolyo.

Gipaabot hinoon sa tagdumala sa terminal nga magdasok og sugod ang mga tawo sa adlaw nga Sabado. (BANAT NEWS)