Sunsport mopahigayon og libreng basketball seminar

CEBU, Philippines — Agi'g pasalamat sa kalampusan nga ilang natagamtaman sa milabayng 24 ka tuig, ang Sunsport Basketball Training Camp modalit og libreng basketball seminar sa tanang interesado karong Disiyembre 28 diha sa Mandaue City Cultural and Sports Complex.

“With the success we enjoyed for the past two decades and a half already, it is only but fitting for us to give something back to our loyal followers. It’s our own way of saying thanks to them this Holiday season,” matud pa ni Sunsport manager Andrew C. Choachuy.

Abli sa tanang mga mahilig og basketbol, magtutudlo sa PE, estudyante, players, coaches ug bisan yano lamang nga mga fans, ang tulo ka oras nga workshop pasiugdahan ni US-based Cebuano skills trainer ug coach Jeff Codera.

Sakop sa Golden State Warriors training camp sa NBA, si Codera usa sab ka lisensiyadong Gold coach sa USA Basketball ubos sa Youth Development Program niini.

Si Codera, nga nakatabang pagbaid sa abilidad sa pipila ka mga national team players sama nilang Reggie Hearn sa Amerika, Adrian Zamora sa Mexico ug sa kababayan niyang si Jeff Chan sa Gilas Pilipinas, mosentro sa iyang ipangtudlo ngadto sa nagkadaiyang mga skills training ug ingon man sa mga ensaktong pamaagi unsaon pagpakondisyon.

Mohisgut sab siya unsaon ang saktong paggamit sa Heavy Training Ball sa Sunsport nga alang kaniya dako og ikatabang pag-ugmad ug pagpalambo sa abilidad sa usa ka atleta.

“Out of this basketball skills seminar, we aim to help the parents, coaches and young talents understand how important it is to improve one’s skills at a higher level,” matud pa ni Codera.

“Nowadays, basketball is evolving that we have to comprehend each aspect of training and how to apply it safely. We also aspire to develop the abilities of each player using the Heavy Training Ball by Sunsport,” dugang pa niya.

Ang rehistrasyon sugdan sa alas-8 sa buntag. Ang seminar magsugod sa alas-9 sa buntag ug mahuman sa alas-12 sa udto. Gawas nga libre, ang tanang partisipante duna say tsansa nga makadaog sa raffle nga idalit sa Sunsport.

Alang sa dugang detalye, kadtong mga interesado mahimong motawag sa Sunsport sa telepono 0943-6496308 o 345-1015. — (BANAT NEWS)