Simbahan nabalaka sa dissolution of marriage

CEBU, Philippines — Atol sa gipahigayong Santos nga Misa alang sa kapistahan sa dakbayan sa Lapu-Lapu si Cebu Archbishop Jose Palma mipalabtik kabahin sa tinguha sa Kongreso sa pagpapas sa kasal o dissolution of marriage.

“Human sa kalipay, goodbye”, kini maoy palabtik sa Arsobispo may kalabutan sa giduso sa Kongreso nga dissolution of marriage diin gikabalak-an kini sa simbahan.

Matud sa Arsobispo nga kong hingpit nga makalusot ang tinguha sa Kongreso mao unya kini hinungdan nga daghang pamilya ang mangagusbat. Si Palma mipahimangno nga sa dili pa magminyo kinahanglang ilhon ug sutaon gyud ang kinaiya ug background sa mahimong kapikas ug dili lang kay magpasagad.

Sumala pa ni Palma nga ang simbahan nihatag og bili ug kasagrado sa pamilya ug natural nga sa kinabuhi adunay malipayon o dili.

 Susama usab kini siya og misteryo diin adunay misteryo sa kasakit ug kalipay hinungdan nga kinahanglang ipadayon ang kabililhon sa kaminyoon.

Ang Arsobispo nipadayag nga magpaabot sila karon sa mga plano sa mga bag-ong molingkod nga mga opisyal sa Catholic Bishops Conference of the Philippines (CBCP) kinsa manumpa karong sunod buwan kong unsa usab ang ilang mga kalihukan nga ipahigayon may kalabutan sa tinguha sa mga Kongresista.  Malaumon ang simbahan nga malamdagan ang mga magbabalaod sa himuon nilang mga lakang. (BANAT NEWS)