Cavs miratsada

CEBU, Philippines — Sa labing unang higayon karon nga season, ang Cleveland Cavaliers nakakulit na gyud og tulo ka sagunson nga daog human ilang gipaluhod ang Charlotte Hornets, 115-107 sa  NBA kagahapon  didto sa Spectrum Center sa Charlotte, North Carolina.

Si LeBron James mikadlit og 31 puntos uban ang walo ka assists ug unom ka rebounds alang sa Cavs nga mitapos sa upat nila ka road games bitbit ang tulo ka sunod-sunod nga daog aron pag-inat sa ilang baraha ngadto sa 8-7.

Kabahin sa  maanindot nga salida ni James mao ang pag-ilog niya sa bola gikan sa Nicolas Batum nga miresulta ngadto sa usa ka makalisang nga dunk nga nakahatag og 111-102 nga labaw sa Cavs sa nahibiling 3:03 sa duwa.

Si Kevin Love miamot og 22 puntos ug 10 ka rebounds, samtang sila si Jeff Green, Kyle Korver ug J.R. Smith nagkumboya’g 34 puntos alang sa Cavs nga miposa og 13 ka tres.

Gawas sa maanindot nga dagan sa ilang opensa, solido sab ang depensa sa Cavs hinungdan nga ilang nalimitahan ang tore sa Hornets nga si Dwight Howards ngadto lamang sa otso puntos ug lima ka rebounds.

Ang Cavs maoy unang nanginit hinungdan nga  sayo dayon kining nakabentaha,19-6, apan hinay-hinay nga migukod ang Hornets hangtod nga mao na ang miabante og tres puntos, 82-79 sa nanghinapos nga bahin sa ikatulong kuwarter.

Dali hinuon nga namawi ang Cavs aron pag-ilog og balik sa  labaw, 95-88 dayon na ngadto sa pagpatilaw sa Hornets sa ikalima nilang sunod-sunod nga pilde.

Si Michael Kidd-Gilchrist miratsada og 22 puntos ug si Kemba Walker midugang og 20 puntos alang sa Hornets  nga nahagba sa ikawalo nilang pilde sa 13 ka duwa. (BANAT NEWS)