EDITORYAL - Hinuktuki mayor

Ang mga tanod sa kabarangayan nagsilbi nga kaabag sa kapolisan sa pagpatunhay sa kahusay ug kalinaw. Giisip sila nga mga “agents to persons in authority” diha sa ilang mga barangay. Ang nakalahi lang kay wala g’yud ilatid sa balaod nga ang mga tanod makahupot og armas sama sa mga polis.

Kon ang tanod aktibo lang sa ilang serbisyo, makuli kaayo nga ang mga badlungon sa katilingban makahimo og krimen. Alang sa maayong pagserbisyo, ang mga tanod kinahanglan usab nga mopatrolya sa lainlaing dapit sa ilang barangay. Mas nindot usab nga ang tanod adunay outpost nga adto sila magpahiluna human sa ilang pagpatrolya.

Sa Barangay Ermita, dakbayan sa Sugbo, nakontrobersiyal si Mayor Tomas Osmeña kay iyang ipaguba ang pito ka outpost sa mga tanod kay nakapahasol kuno kini sa mga tawo. Ang mao nga mga tanod outposts diha na kini sa maong dapit sulod sa daghan na nga katuigan. Kon wala man sa tukma nga pwesto ang mao nga mga outpost sa tanod, angay tingali nga balhinon lang sa tukma nga lugar, nungka nga kini panggub-on.

Nindot kaayo kon si Mayor Osmeña nagpakabana na sa mga butang nga nakapahasol sa mga tawo, apan angay usab niya nga ipakita ang iyang pagpakabana pinaagi sa pagpaguba sa daghang illegal structures nga anaa sa mga aseras nga dili na gani kaagian sa mga tawo.

Kon ang mga tanod outpost lang sa Ermita maoy iyang ipaguba, dili kalikayan sa mga tawo ang pagduda nga gihimo kini sa mayor tungod kay wala man sila’y maayong relasyon ug ni Kapitan Imok Rupinta nga dili niya kaalyado sa politika.

Unta, hunahunaon pag-ayo ni Mayor Osmeña ang iyang hukom kabahin sa pagpaguba sa mga tanod outpost sa Ermita kay tabla ra nga gusto niyang molambo ang krimen sa maong barangay, imbes patunhayon ang kahusay ug kalinaw.