Tulis sa mga PUJ nisiaw sa Talisay

CEBU, Philippines — Nisiaw ang mga tulisan sa pangpasaheroang jeep sa Dakbayan sa Talisay human sa sunod-sunod nga insidente sa usa lang ka adlaw.

Si Ericka Casas, 19, taga Siyudad sa Sugbo, ang nidangop sa kapolisan human siya gikuhaan sa iyang cellphone nga nagkantidad og P16 mil sa duha ka tulisan.

Nailhan ang duha pinaagi sa pagtan-aw sa rogues gallery nga mao sila si Rejan Bagonggong ug si Rios Cabuenas.

Asoy pa niya nga gikan siya sa Basak, Siyudad sa Sugbo ug paingon unta sa Lungsod sa Minglanilla apan pag-abot nila sa Sitio Mananga, Barangay Tabunok gilabni ang iyang cellphone sa duha ka tulisan kinsa daling niambak sa jeep.

Samtang alas 9:40 sa gabii, babaye ug lalaki maoy nagkuyog sa pagdangop sa kapolisan kay sila nabiktima sab sa pagpanulis samtang sakay sa pangpasaheroang jeep.

Ang mga biktima nailhan nga sila si Maricor Manto, 23, dalaga, taga Barangay Lawaan 3 sa nahisgutang siyudad, ug si Joseph Cabrillos, 30-anyos.

Nagpakaaron-ingnon nga pasahero ang tulo ka tulisan dayon tion og armas ug nideklarar og tulis sa Sitio Mananga 2, Tabunok.

Nakuha ang bag ni Manto nga aduna’y sulod cellphone, kwarta ug ubang importante mga butang samtang P300 lang nga kwarta ang nakuha gikan ni Cabrillos.

Ang mga biktima nitudlo sab nila ni Cabuenas ug Bagonggong ug laing wala ilhi nga mao na sab ang responsable sa krimen. (BANAT NEWS)