Basura sa Talisay di maato pagkolekta
CEBU, Philippines — Giangkon sa pangulo sa Ecological Solid Waste Management sa Dakbayan sa Talisay nga daw murag wala’y hurot-hurot ang mga basura sa bisan asa nga barangay sa dakbayan.
Kini bisan pa man og padayon ang paglibot sa mga garbage trucks aron sa pagkolekta sa mga basura.
Si Edwin Nierves nagkanayon nga kuwangan gyud ang ilang mga garbage trucks tungod sa grabeng gidaghanon sa mga basura.
Asoy pa ni Nierves nga dili gyud mawagtang ang mga tinapok nga basura sa karsada tungod kay dili modumdom sa eskedyul nga mopundo og basura sa karsada ang katawhan.
Matud niya nga bisan pa og kapila sila mopahinumdum sa eskedyul sa pagkuha, padayon gihapon nga mobutang sa ilang basura sa karsada.
“Bag-o pa gani nga gikuha sa garbage truck ang tinapok nga basura sundon sad dayon nila og butang na sab og basura mao na nga wala’y hurot-hurot ang basura nga makita sa karsada,” nagkanayon si Nierves.
Dugang pa niya nga unta ang katawhan adunay disiplina sa paglabay sa ilang mga basura tungod kay ang ilang pagpataka og labay sa basura mahimo kining masumbalik nila ug sa tanan sa higayon nga makatag kini ug mopaingon sa mga kanal. - /GMR) (BANAT NEWS)
- Latest
