Local DRRMOs sa Sugbo alerto

CEBU, Philippines — Gibutang karon sa kaandam ang tanang local nga mga disaster risk reduction management offices sa Sugbo nunot niining daotang panahon nga nimugna og mga pagbaha ug pagdahili sa yuta. Sa dakbayan sa Sugbo, midahili na usab ang yuta diha sa Sitio Garaje, Barangay Busay ug naalihan ang dalan padung sa Temple of  Leah nga popular nga suroyan sa maong dapit.

Pipila ka bulan na ang milabay dihang nahitabo ang susamang pagdahili sa yuta sa mao gihapong lugar nga miresulta sa pagkapiyapi sa mga sakyanan nga gigarahe sa maong dapit.

Nagkanayon ang pangulo sa Cebu City Disaster Risk Reduction Management Office (CCDRRMO) Nagiel Bañacia ang Busay Disaster Council wala una motugot nga paagian ang maong dalan alang sa kaluwasan sa mga moagi sa dapit.

Dugang ni Bañacia ang mga engineers naghimo dayon og clearing operations ug giawhag usab niya ang mga opisyales sa maong barangay nga mopasar og resolusyon nga mag-awhag sa tag-iya nga i-demolish ang estraktura nga nagpatong sa midahili nga yuta.

Kini tungod kay nahimo na kining risgo sa publiko. Dili makabuot ang siyudad pagdemolis niini tungod kay pribado kini nga luna.

“Dunay procedure sa pag-agi sa mga tawo like butangan nato og warning tumoy-tumoy agi na niya duna gyuy magbantay mentras tanto nga dili pa nila ma-demolish ang kadtong structure sa babaw,” sigon ni Bañacia.

Gawas sa Barangay Busay, laing landslide usab ang nahitabo sa Sitio Baksan, Barangay Sapangdaku  nga dali usab kaayong gitangtang aron makaagi ang mga motorista. Si Cebu City Mayor Tomas Osmeña miingon gilauman na niya nga dunay mga pagdahili sa yuta nga mahitabo nunot niining sagunson nga pag-uwan mao nga gipabutang niyang daan sa strategic areas ang mga heavy equipment sa siyudad.

Mandaue City

Sa Mandaue City, gitutukan karon sa CDRRMO ang 12 ka barangays nga giilang kuyaw kaayo sa pagbaha o sa pagdahili sa yuta sa panahon nga kusog ang pagbunok sa ulan.

Si CDRRM Officer Felix Suico Jr.  miingon nga pirmeng bahaon ang Tipolo, Subangdaku, Guizo, Mantuyong, Looc, Cambaro, Umapad, Paknaan ug Cubacub.

Ang mga barangay nga kuyaw sa pagdahili sa yuta mao ang Casili, Cubacub  ug Tawason ug kapin sa 100 ka pamilya ang posibleng pahiklinon una sa mas luwas nga dapit kun magbunok ang uwan.

Gilunopan

Samtang unom ka mga tunghaan sa Dakbayan sa Lapu-Lapu ang naapektohan sa baha adlaw nga Lunes, usa niini ang Babag Dos Elementary School nga pwerteng lawoma sa tubig nga napundo.

Matud pa ni Lerio Tapdasan, OIC sa Babag Elementary School, kalbaryo sa mga tinun-an ug magtutudlo ang ilang kahimtang tungod kay gamay’ng ulan lunopan dayon ang ilang dapit ug lisod pahubason.

Ang Project Development Officer sa DepEd Lapu-Lapu Elena Berame, makig-alayon sa City Engineering Office ug ubang ahensiya sa kagamhanan aron mahatagan og kasulbaran ang maong problema.

Lakip sa nakasinati ug pagbaha ang Marigondon Elementary School, Pajo Elementary School, Tiange Elem School, ug mga tunghaan sa Barangay Basak.           

Gipabakwit

Sa laing bahin, 64 ka mga pamilya gikan sa duha ka barangay sa lungsod sa Sta. Fe ug Madridejos isla sa Bantayan ang gipabakwit niadtong Lunes human sa kusog kaayo nga ulan.

Si Baltazar Tribunalo ang pangulo sa PDRRMO mipahimangno sa publiko nga di mokompiyansa aron paglikay sa bisa’g unsa nga disgrasya. (BANAT NEWS)