Ubang CT-TODA enforcers wala pay uniporme
CEBU, Philippines - Giangkon sa pangulo sa City of Talisay-Traffic Operation Development Authority (CT-TODA) nga may mga sakop pa siya nga wala pa nahatagan og uniporme.
Si Almond Dela Peña nibutyag nga ang nigawas nga hulagway sa Facebook dali niyang gisusi ug nasuta nga nipugos gyud og labang ang motorsiklo hinungdan nga gisita sa iyang sakop nga wala nag-uniporme.
Matud niya nga dili pa tanan niyang mga sakop ang may uniporme na tungod kay ang uban mga bag-o pa apan iyang gipasalig nga niagi na kini sa saktong training.
Si Dela Peña nagkanayon nga iyang gibadlong ang iyang sakop nga nagsul-ob og tag-as ug lawlaw nga karsones ug hip hop nga kawo samtang duty sa kadalanan.
“Ako siya’ng gibadlong ug giingnan nga wala ta sa cultural arts naa ta sa traffic. Hinoon nangayo ra sab kini og pasaylo,” matud ni Dela Peña.
Siya nagkanayon nga iya nang gipaabot sa buhatan sa City Administrator ang kabahin sa uniporme.
Sa pagkakaron iyang gihangyo ang iyang mga sakop nga kon wala pa sila’y uniporme, magsul-ob sila og color green nga susama sa kolor sa ilang uniporme karon.
Nigawas sa social media ang sakop sa CT-TODA nga nisita og motorista nga daw ang nagkuha sa hulagway naglibog kon kinsa ang enforcer o kinsa ang gidakop kay pulos man nagsibilyan ang nakuha sa hulagway sa Facebook. (BANAT NEWS)
- Latest
