CJ Sereno di apektado sa impeachment
CEBU, Philippines – Dili apektado si Supreme Court Chief Justice Maria Lourdes Sereno sa impeachment complaint nga gisang-at batok kaniya.
Matud ni Sereno nga limpyo ang iyang konsensiya ug wala siya mag-usik-usik sa kwarta sa gobiyerno.
“Yan ang maganda sa malinis na konsensiya. It does not affect me at all. I have always lived a life of modesty. I have been prudent in the use of Court’s resources. All the expenses for the judicial reform, my travels, my security and vehicle requirements are all regular and above board,” matud niya.
Bukas si Sereno sa pagsusi sa mga dokumento sa iyang mga biyahe ingon man sa security ug transportasyon.
Si Sereno kinsa nakigtagbo sa mga sakop sa media sa Sugbo ug mga tinun-an ug faculty sa University of San Carlos (USC) College of Law kagahapon nisaad nga wala siya’y gihimo nga dili maayo.
Siya niangkon nga nakagamit siya og presidential suite didto sa Boracay uban ang mga chief justices sa laing nasud nga apil sa Association of South-East Asian Nation (ASEAN) apan iyang gitataw nga apil kini sa package ug libre.
“Photo taking session happened there, so what do we do? You sleep in the suite right? So that’s it, so does it mean that I took the presidential suite? No I did not, I mean did I make the people pay for the suite? I did not,” matud ni Sereno.
Wala na hinoon mokomento pa ang chief justice sa mga taho nga posibleng si Presidente Rodrigo Duterte ang nagpaluyo sa impeachment complaint batok kaniya.
Samtang si Sereno nipresentar sab sa mga judicial reforms nga gihimo sa judiciary department apil na niini ang plano nga pagtukod og Integrated Judiciary Complex sa Sugbo nga gigahinan nila og pundo.
Kini aron mahatagan og permanenteng puy-anan ang mga korte sa Sugbo nga kasamtangang anaa karon sa Qimonda IT Building human naguba ang Palace of Justice sulod sa Capitol Compound sa linog niadtong 2013 ug bagyong Yolanda. (BANAT NEWS)
- Latest
