Pito sikop sa buy-bust, checkpoint operation

CEBU, Philippines – Nadakpan ang duha ka gikatahapang pusher sa managlahing buy-bust operation sa mga sakop sa Lapu-Lapu City Police Office (LLCPO) ug laing duha  ka lalaki nga nagsakay og motorsiklo nga nagdala og shabu sa checkpoint sa Mandaue City Police Office (MCPO) alas 2 pasado niadtong Domingo sa kadlawon.

Si Senior Police Officer 1 Jeffrey Managase sa Presinto 3 sa LLCPO niila sa nadakpan sa buy-bust operation sa Purok Saging, Barangay Gun-ob nga mao si Miguel Ybañez , 23, nagpuyo sa maong dapit.

Nasakmit gikan sa dinakpan ang 10 ka gagmay nga pakete sa shabu.

Laing nadakpan sa buy-bust operation mao si Arnold Argiente Berame, 22, walay trabaho ug nagpuyo sa maong dapit kinsa nasakmitan og 12 ka gagmay nga pakete sa shabu.

Samtang ang team sa Presinto 2 sa MCPO ang nidakop sab sa duha ka motorista nga nakuhaan og shabu sa checkpoint sa may Hyper Mart, Subangdaku.

Ang mga nadakpan mao sila si Bimbo Velasquez, 42, taga Upper Jagobiao ug Ruben Riveral, 31, taga Dakbayan sa Bogo, kinsa nasakmitan og duha ka gagmay nga pakete sa shabu.

Samtang ang kapolisan sa Lungsod sa Consolacion ang nisikop sa usa ka Glenn Mark Nebrida, 19, human namatikdi nga kadudahan ang lihok atol sa ilang pagpatrolya.

Dihang gisita ug girekisa, nahibaw-an nga nagdala kini  og usa ka gamay nga pakete  sa shabu.

Sa laing bahin, duha ka tawo ang nasikop sa buy-bust operation sa kapolisan sa Dakbayan sa Talisay ug Lungsod sa Aloguinsan niadtong Sabado.

Unang nasikop sa may Sitio Rama, Dumlog, Talisay City mao si Sean Campo alyas Parak, 25, ulitawo, taga Zone 4, San Jose, Barangay Dumlog.

Balor og dul-an sa P4 mil ang shabu nga nasakmit gikan sa suspek.

Ikaduhang operation nahitabo sa may Barangay Bonbon, Aloguinsan.

Ang nasikop mao si Junel Banguiran, 24, ulitawo, canvasser ug residente sa Saksak, Pinamungajan, kinsa nakuhaan og duha ka rolyo nga tin foil, lighter ug duha ka putos sa gituohang shabu.

Matud ni Police Inspector Sigmund Freud Cruz nga nakadawat sila og taho nga may nagsuyop sa maong lugar ug didto nasikop si  Banguiran ug nasakmitan og mga kontrabando. -/GMR (BANAT NEWS)