10-anyos gitionan sa 15-anyos
CEBU, Philippines – Nanion og pusil ang 15-anyos ngadto sa usa ka 10-anyos sa Poblacion, Sibonga niadtong Sabado.
Naglakaw ra pauli sa ilang panimalay ang 10-anyos nga batang lalaki dihang gisundan siya sa 15-anyos.
Ang hepe sa Sibonga Police Station nga si Police Chief Inspector Stephen Amamag-id niingon nga gikan namista ang 15-anyos.
Matud pa nga komedya ra ang gihimo sa 15-anyos kay walay bala ang armas.
Gisumbong sa bata sa iyang ginikanan ang maong insidente hinungdan nga gisumbong sa kapolisan.
Gibutyag ni Amamag-id nga dunay usa ka kalibre .22 ang napalgan sulod sa pansayan sa balay sa 15-anyos apan wala pa masuta kon kinsa gyud ang nanag-iya sa maong armas.
Dugang ni Amamag-id nga ila pa karong gisusi kung duna bay tulubagon ang amahan niini apan giklaro lang niya nga kon mapamatud-an nga ang amahan gyud ang nanag-iya, dili kini mapasakaan og illegal possession of fire arms tungod kay wala kini nakuha sa iyang posesyon.
Kasong grave threat ang atubangon sa bata kinsa naa na karon sa mga kamot sa Department of Social Welfare and Development. -/GMR (BANAT NEWS)
- Latest
