Grabeng kainit maoy nakapauwan

CEBU, Philippines – Niadtong adlaw nga Sabado nakasinati og tumang kainit sa panahon ang Sugbo. Apan ikaduha lamang kadto karong bulana sumala pa sa Philippine Atmospheric Geophysical and Astronomical Services Administration sa Mactan.

Ang sobrang kataas sa temperatura sa adlawan mao ang nakitang hinungdan nga naporma kining gitawag og localized thunderstorms ini og kagabii sa nagkalainlaing lugar sa probinsya sa Sugbo. Niadtong Sabado sa udto, miabot og 33.4 degrees Celsius ang kainiton sa Sugbo nga natala apan niadtong Agosto 6 niabot gyud sa 33.9 degrees Celsius ang kainiton sa panahon.

Si Engr. Alfredo Quiblat, ang officer-in-charge sa PAGASA – Cebu, mipasabot nga tungod niini paspas ang pagsaka sa yamog ug tubig padung sa mga panganod nga sa kadugayan mahimong ulan nga sagad mahitabo ini og kagabii o kaadlawon ini og bugnaw na ang panahon.

Ang PAGASA miisyu og mga thunderstorm advisories sa Sabado sa gabii ug sa mga miaging adlaw sa gabii sa nagkalainlaing lugar sa probinsya.

Si Quiblat mipasidaan nga magdala kini og kusog nga uwan ug hangin, pagnugdog, pagkilat ug usahay magdala og alimpos o buhawi.

Siya nagkanayon nga ang init nga panahon namugna tungod sa presensya sa ridge of High Pressure Area nga maisip nga “good weather” mao say nagpasulabi ug nakapahinay sa hanging habagat nga magdala og mga pag-ulan sa nasud.Kon sutaon ang historical data sa PAGASA, ang average normal temperature sa Agosto nipatong sa 28.3 degrees Celsius. -/EIM (BANAT NEWS)