Mga durugista usahon og selda

CEBU, Philippines - Nagplano karon ang hepe sa kapolisan dinhi sa dakbayan sa Sugbo nga ang tanang madakpan nga may kalabotan sa drugas usahon lang sa pagtanggong diha sa Cebu City Police Office sa Camp Sotero Cabahug.

Matud ni Senior Supt. Joel Doria nga ipatuman usab nila ang “no contact policy” ngadto sa mga tawo nga ilang madakpan sa drugas ug dili sila isagol sa ubang dinakpan nga ang kaso wala maglambigit og ilegal nga drugas. Ang mao nga paagi nahunahunaan ni Doria human niya masuta base sa statistics nga nagkadaghan gihapon ang mga durugista, ilabi na kadtong bag-ohay lang nga nalambigit sa maong negosyo.

“Others po kasi yung mga user, yun po sometimes nakakapag-bail sila. Ang pinakamaganda dito ay hindi na sila mahahalo doon sa mga involved sa petty crimes. At least ma-minimize natin yung recruitment ng mga pusher na yan,” matud ni Doria. Gusto usab ni Doria nga ang mga dinakpan ug ang mga tawo nga mobisita kanila kinahanglang walay “physical contact” ug adunay samin nga mag-uwang kanila nga may gagmay’ng lungag aron madungog ang ilang tingog.

Ang tumong niini aron nga dili gayud mahitabo nga may makapalusot og ilegal nga drugas ngadto sa mga dinakpan. (BANAT NEWS)