Menor de edad gitaban

CEBU, Philippines - Dalagita nga wala na mouli sa ilang panimalay mga usa ka tuig na ang milabay human kini gitaban sa 42-anyos nga “drug pusher,” naluwas sa kapolisan didto sa ilang gipuy-an sa Barangay Danglag, lungsod sa  Consolacion kaniadtong Biyernes.

Si Senior Inspector Romeo Caacoy, deputy chief sa Consolacion Police Station, miingon nga dugay na kaayo nga nangita ang mga ginikanan sa ilang anak, apan karong bag-o na lang sila nasayod nga anaa ra diay kini sa Barangay Danglag.

Matud ni Caacoy nga nangayo kanila og tabang ang mga ginikanan sa dalagita ug hinungdan nga naluwas nila kini gikan sa suspek nga mao si Richard Sasing Oncenes nga nagpuyo ra usab sa maong barangay.

Dili lang ibutyag sa Banat News ang ngalan sa dalagita, apan matud sa kapolisan nga ang suspek ila g’yud nga pasakaan og kaso kay desidido ang ginikanan kini ikiha sa gihimo sa ilang anak.

Nagtuo ang kapolisan nga nahilabtan na g’yud ang dalagita kay adunay nakasulti nga susama na sila sa managtiayon. Ang balaod naglatid nga bisan pa og kabubut-on sa babaye ang pag-uban ngadto sa lalaki, sad-an gihapon ang lalaki kon ang babaye usa pa ka menor de edad.

Nasayran nga nagkaila ang dalagita ug si Oncenes tungod kay ang babaye gikataho nga mogamit na og drugas bisan sa iyang kabatan-on. Matud pa nga atol sa pagdakop ni Oncenes, nakuhaan kini og duha ka paketeng shabu.

Tungod niini, duha ka kaso nga paglapas sa Child Abuse Law ug balaod sa drugas ang ipasaka sa kapolisan didto sa hukmanan batok ni Oncenes. (BANAT NEWS)