Limpyohan ang nagubang pangalan

CEBU, Philippines - Kanhi Cebu City Councilor Gerardo “Gerry” Carillo, wala nay tinguha nga mobalik sa politika kay buot na niyang motutok sa iyang pagka-abogado, apan iya usang  limpyohon ang iyang pangalan subay sa nahimong desisyon sa Office of the Ombudsman in the Visayas nga dili na siya mahimong makadagan ug bisan unsa nga posisyon sa kagamhanan.

Moduso og motion for reconsideration si Atty. Carillo aron magamit ang tanang alibyo pag-alkontra batok sa desisyon sa Ombudsman nga giingong adunay daghang mga sayop. Sumala pa niini nga wala siya masayod kon unsay gibasehan sa Ombudsman sa ilang desisyon, hinungdan nga malaumon siyang mogawas ang mga saksi aron makapahigayon sila og cross examination.

Dugang ni Carillo nga gihatagan sila og lima ngadto sa 10 ka adlaw aron makaduso og mosyon.

Iyang gibutyag nga wala na siyay laraw nga modagan pa sa sunod nga mga piniliay kay sakto na usab ang iyang serbisyo nga nahatag sa katawhan ug panahon na usab nga motutok siya sa iyang pagka abogado.

Subay niini iya unang limpyohon ang naguba niyang pangalan ilabi na nga daghan siyang nahimong ordinansa ug resolusyon dihang aktibo pa siya sa Konseho sa Siyudad sa Sugbo.

Gitug-an ni Carillo nga tungod sa pamolitika, nakalimtan ang iyang mga nahimo hinungdan nga buhaton niya ang tanang legal remedy kay matod pa walay basehanan ang desisyon nga giluwatan sa Ombudsman. (BANAT NEWS)