Gidunggab sa bayaw patay

CEBU, Philippines - Patay ang usa ka lalake human kini  unaya sa pagdunggab sa iyang bayaw tungod sa away nila sa iro niadtong Biyernes sa hapon diha sa Barangay Cogon, lungsod sa Dumanjug.

Ang biktima giila nga si Glenn Acogido ug ang suspetsado mao si Nelson Catubay parehong hingkod ang panuigon ug mga residente sa nahisgutang lugar.

Si Catubay nagtingkagol karon sa Dumanjug Police Station detention cell human kini masikop sa kapolisan ug sa mga silingan niini nga mitabang og gukod kaniya.

Si SPO1 Samuel Asipong sa Dumanjug Police Station mibutyag nga niadtong Huwebes si Acogido ug Catubay nagkasumpaki.

Matud ni Asipong nga gibato sa suspetsado ang iro sa biktima hinungdan nga gibadlong kini sa naulahi. Ang suspetsado nasuko nga gibadlong sa biktima.

Sa wala pa mahitabo ang pagpanunggab ang biktima nag-atang kini og motorsiklo nga masakyan paingon ngadto sa iyang umahan dihang kalit kining giatake sa suspetsado kinsa niadtong higayona aduna nay dalang kitchen knife.

Si Acogido nakaangkon og pito ka samad dinunggaban sa iyang liog ug dughan nga maoy hinungdan sa kamatayon niini.

Giingong sa paghuman og dunggab misulti pa ang suspetsado nga ‘dah! patay ka lagi!”. - /BDB) (BANAT NEWS)