Mga peke ni Aguirre
Labing lig-ong lusot ni Justice Secretary Vitaliano Aguirre sa iyang pakauwaw og pasangil nga ang gubat sa Marawi City kabahin sa mga paningkamot sa politikanhong oposisyon pagpalagpot sa pamunoan ni Presidente Rodrigo Duterte, mao nga dili siya ra’y nabiktima sa fake news.
Nabiktima na sab ang iyang kaubanan sa gabinete. Pipila gani nila gipasanginlan man nga maoy tigpakatap og fake news. Makapasalipod sab siya sa pait nga kamatuoran nga ang kinabag-an sa katawhan sa pipila ka kanasuran, nailad sa fake news. Mao nga nidaog si Donald Trump sa Estados Unidos ug ang Brexit sa Uropa.
* * *
Labing dako ug labing uwahing biktima sa fake news mao gyud ang mga nasud sa Middle East. Naputol ang diplomatikanhong relasyon tali sa Qatar ug Saudi Arabia, Bahrain, United Arab Emirates, Egypt, Yemen ug Maldives tungod lang pagmaniobra sa opisyal nga website sa Qatar.
Napamatud-an sa imbestigasyon sa mga eksperto sa nagkalainlaing kanasuran nga gi-hack ang website sa Qatar News Agency ug pangilad ang taho nga ang pangulo sa Qatar nipabor sa Iran ug sa Hamas, ug Hezbollah, nga maoy nakapaulbo sa Saudi ug ubang kanasuran.
* * *
Tunlon ba sa mga nasud nga nisilot sa Qatar ang ilang garbo, angkunon ang ilang sayop ug banhawon ang diplomatikanhon nilang relasyon? Kon ila ning himoon, masulbad dayon ning labing dakong krisis sa rehiyon.
Apan kon ilang sundon si kanhi presidente Gloria Macapagal-Arroyo, mahimong moburot pa ang panagsungi. Gipasanginlan si Arroyo nga nasayop og tudlo sa whistleblower sa Land Bank of the Philippines (LBP) nga maoy responsable sa pangurakot.
Inay tul-iron ang sayop, gikatahong gisugo niya ang National Bureau of Investigation (NBI) pagkiha sa whistleblower.
* * *
Balik ni Aguirre, may sukaranan ang pasangil nga dili siya inosenteng biktima sa fake news, kay siya mismo nasakpan nga naghimu-himo og iyang kaugalingong estorya nga napamatud-an nga dako diay’ng bakak.
Nipasangil siya nga gibanhigan ang asawa sa piniriso nga nangangkong bayran sila og P100 milyones aron mobakwi ang iyang kaubanang piniriso sa ilang testimoniya batok ni Senador Leila de Lima.
Gibakwi sa babaye ang pasangil. Ang NBI niingon nga walay pagpamanhig nga nahitabo. Apan niinsistir gihapon si Aguirre nga tinuod ug dili peke ang iyang kasayuran.
* * *
- Latest
