Shootout: Drug supplier bulagta

COTABATO CITY, Philippines  -  Bulagta ang isang notoryus na supplier ng droga makaraang manlaban umano sa mga pulis habang inaaresto sa Purok Tagumpay, Brgy. San Isidro, partikular sa Crossing Dose sa bayan ng Sto. Niño, South Cotabato kamakalawa. Kinilala ni Isulan, Sultan Kudarat chief of police, Supt. Joefel Siason ang  suspek na si Regie Bonghe “alyas” Macho, ng Brgy Dajay, Surallah, South Cotabato na dead-on-arrival sa pagamutan. Sa ulat, nabaril ng mga pulis si Bonghe nang makipagbarilan sa kanila matapos tumakbo nang matumba ang kanyang motorsiklo sa highway. Tatlong magazine ng 45 pistol ang naubos ni Bonghe bago nasukol ng pinagsanib na puwersa ng Isulan at Sto. Niño Police sa gitna ng palayan alas-2 ng hapon nitong Huwebes. Narekober sa lugar ang isang 45 pistol, isang sachet ng suspected shabu at pitaka.